Polisi yatangiye gukoresha ‘Drones ‘ ikangurira abantu kwirinda Coronavirus

Mu rwego rwo gukomeza gukangurira abaturarwanda kwirinda icyorezo cya Koronavirusi, Polisi y’u Rwanda yatangiye gukoresha indege ntoya zidafite abapilote.

Izi ndege ziragenda zitambutsa ubutumwa mu baturage bubakangurira kuguma mu rugo mu rwego rwo kwirinda icyorezo cya Koronavirusi.

Polisi y’u Rwanda itangije ubu buryo nyuma y’ubwari busanzweho bwo gukoresha imodoka aho zanyuraga ahantu hatandukanye nko mu mihanda, ku masoko n’ahandi hantu hakunze guhurira abantu benshi ndetse ikaba yanakoreshaga imbuga nkoranyambaga mu gutambutsa ubutumwa bwo kwirinda icyorezo.

Umuvugizi wa Polisi y’u Rwanda, Commissioner of Police (CP) John Bosco Kabera yavuze ko izi ndege zije kunganira ubundi buryo bwari busanzwe bukoreshwa.

Yagize ati "Izi ndege zije ari inyongera ku bundi buryo twakoreshaga. Abaturage iyo bumva ubutumwa barushaho gukurikiza amabwiriza. Twizera ko iyo abaturage bamenye amakuru igikorwa bakigira icyabo."

CP Kabera yakomeje akangurira abantu kujya batega amatwi bitonze ubutumwa butangwa na ziriya ndege. Yabasabye kutava mu ngo zabo bitwaje ko bagiye kuzireba, kwirinda gukora amatsinda.

Umuvugizi wa Polisi yongeye kwibutsa abaturage ko kuguma mu rugo ari ukurinda ubuzima bwawe, umuryango ndetse n’abandi bantu. Yavuze ko kwirinda kwegerana no guhana intera hagati y’umuntu n’undi bifasha kurinda ubuzima, bikanafasha igihugu gukomeza kurwanya icyorezo cya Coronavirus.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO