Priscillah yasohoye indirimbo ihumuriza abihebye muri ibi bihe

Umuhanzikazi Nyarwanda Princes Priscillah ubarizwa muri Leta Zunze Ubumwe z’Amerika yasohoye indirimbo nshya yise “Ihumure” avuga ko ari iyo guhumuriza abantu muri ibi bihe isi yugarijwe na COVID-19.

Muri iyi ndirimbo nshya ya Priscillah yise ‘Ihumure’ aba aririmba agira ati “Ndabona umucyo ikirere gituje, ndabona Paradizo inyoni ziriririmba nyuma yibihe bikomeye, ibyiza birakomeza ibyiza biri imbere never up izere Imana haracyari ibyiringiro ko ejo ari heza…”

Mu kiganiro yagiranye na Genesisbizz yavuze ko iyi ndirimbo yayikoze atekereza umuntu wese ubabaye cyangwa wihebye.

Ati “Igitekerezo cy’iyi ndirimbo cyavuye k’ukuntu nabonaga ibintu byifashe muri iyi minsi, isi yose abantu barahangayitse sinaba ntandukiye mvuze ko hari n’abihebye kubera ibihe turimo na pandemic ya Covid-19. Byumwihariko rero nk’Abanyarwanda tukaba turi no mu bihe byo kwibuka, numvise indirimbo ihumuriza abantu yaba ikenewe.”

Mu butumwa bwe asaba abantu kugira ikizere ngo kuko Imana ntaho yagiye.

Ati “Tugire ikizere kuko Imana ntaho yagiye tuyiringire ibi byose bizashira. Byumwihariko tugire urukundo, rurakenewe cyane muri ibi bihe uwagiriwe ubuntu wese akaba afite uburyo yafasha mugenzi yabikora.”

Indirimbo ye nshya yakozwe na Producer witwa Giggz, akomoka muri Kenya ariko amaze imyaka irenga icumi akorera umuziki muri Amerika.

Amashusho y’iyi ndirimbo avuga ko atakozwe bitewe n’ibihe byo kuguma mu rugo ariko mu minsi iri kuza azareba uko bizaba bimeze.

Indirimbo nshya ya Priscillah yise ’Ihumure’

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO