Producer ‘Lick Lick’ yiyeguriye Nyagasani

Mbabazi Isaac wamenyakanye nka Producer Lick Lick uba muri Leta Zunze Ubumwe z’Amerika abinyujije ku mbuga nkoranyambaga ze yatangaje ko ubu yamaze kwegurira umutima we Nyagasani.

Usuye urubuga rwa Instagram rwa Lick Lick urasanga yarasibye amafoto yose yari yarashyizeho. Ubu hariho abiri gusa imwe iriho umusaraba indi iriho ijambo ry’Imana.

Aho aba avuga ko umutima we yawerekeje kuri Kristo. Ati “Ubu nta kindi kintu cy’agaciro ubu kiruta kumenya urukundo rw’Imana.”

Uyu mu Producer yahinduye n’amazina yakoreshaga kuri uru rubuga ubu asigaye akoresha izina rya ‘Mbabazi Lick’ mugihe yarasanzwe akoresha irya ‘Licklinca.’

Ahashyirwa umwirondoro kuri Instagram, we yahashyize umurongo wo muri Bibiliya wanditswe muri ‘Hozeya 4:6.’

Ugira uti “Ubwoko bwanjye buzarimbuka kubera kutamenya. Ubwo mwanze kumenya, nanjye nzanga ko mumbera abatambyi, ubwo mwirengagije Amategeko yanjye, jyewe Imana yanyu nzirengagiza abana banyu.”

Muri 2012 nibwo Lick Lick yagiye muri America ajyanywe na The Ben, K8 Kavuyo na Meddy kugirango ajye abafasha gukora ibihangano byabo muburyo bworoshye.

Uyu mugabo wubatse izina mu gutunganya indirimbo mu Rwanda yahavuye yarabyaranye n’umuhanzikazi Oda Paccy.

Muri Amerika agiye kumara imyaka irenga umunani, yavuzweho inkuru y’urukundo rimwe ubyo byavugwaga ko yaba akundana n’umuhanzi Princess Priscillah babanaga mu nzu muri Leta ya Ohio ariko nyuma baza gutandukana.

Mu bahanzi ni kenshi havugwa inkuru z’uko bamwe biyeguriye Nyagasani ariko ugasanga bibaye iby’igihe gito.

Uheruka kubikora ni Umuraperi Bull Dogg wari watangaje ko ahagaritse gukora indirimbo z’isi (secular) ko agiye kujya akora izo kuramya no guhimbaza Imana ndetse akanakizwa akakira Yesu Kristu nk’umwami n’umukiza.

Ibi ntabwo byaje kuramba kuko nyuma y’amezi make hatangiye gusohoka indirimbo z’imwe na zimwe yagiye akorana n’abandi bahanzi zitari iza Gospel.

Umwe mu nshuti za hafi na Bull Dogg twaganiriye tumubaza ku mpamvu yaba yaratumye adakomera ku ijambo yavuze yagize ati “Yaje gusanga erega muri Gospel nta mafaranga arimo agereranyije n’ayo yabonaga muri Secular.”


Lick Lick ubu yamaze kwiyegurira Nyagasani

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO