RDB yibukije amahoteli n’utubyiniro guhagarika ibikorwa by’imyidagaduro

Ikigo cy’igihugu cy’iterambere (RDB) gishingiye ku mabwiriza ya Minisiteri y’Ubuzima mu kwirinda icyorezo cya Coronavirus, cyashyize hanze itangazo ryihutirwa rigenewe amahoteli, n’andi macumbi, amaresitora, utubari, n’utubyiniro.

Bene ibi bikorwa by’ubucuruzi barasabwa gushyira ibikoresho by’isuku aho ababagana n’abakozi binjirira no guhagarika ibikorwa byose by’imyidagaduro kugeza hatanzwe andi mabwiriza.

Abakiriya ba resitora bakirwa bicaye, RDB yibukije ko bagomba kubahiriza byibura intera ya metero imwe hagati y’umuntu n’undi, ibyo bikagenzurwa kandi bikubahirizwa n’abayobozi b’ibi bikorwa by’ubucuruzi.

Kugeza ubu mu Rwanda hamaze kubarurwa abantu 8 banduye Coronavirus, icyorezo cyatangiriye mu ntara ya Wuhan mu Bushinwa kuva mu mpera za 2019 kikaba kimaze kugera mu bihugu bisaga 150 hirya no hino ku isi.

Amabwiriza ya Minisiteri y’Ubuzima asaba abantu kwirinda gusuhuzanya bakorana mu ntoki no guhoberana, kuko ari bimwe mu byoroshya ikwirakwira ry’iyi virusi.

Abambara ‘mask’ kimwe n’abambara ‘gant’, Ikigo cy’igihugu cy’ubuzima (RBC) kivuga ko ntacyo bibafasha mu kwirinda iki cyorezo, ko ibyo bikwiye kwambarwa n’abantu barwaye cyangwa ababitaho.

Hagati aho, amashuri n’insengero bimaze iminsi bifunzwe mu gihugu hose, kimwe n’ibizamini by’akazi mu nzego za leta na byo itangazo ryasohotse ejo rya Minisiteri y’abakozi ba leta n’umurimo (MIFOTRA) rivuga ko byahagaritswe kuko mu bizamini hahurira abantu benshi.

Biri mu murongo umwe n’icyemezo cyafashwe mbere na minisiteri y’ubuzima, gisaba abaturarwanda bose kwirinda kujya ahantu hahurira abantu benshi mu rwego rwo kwirinda kwanduzanya iyo ndwara ihangayikishije isi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO