Rayon Sports yemeye ko yatanze Rutanga muri Police FC ku bwumvikane

Ubuyobozi bw’ikipe ya Rayon Sport bwatangaje ko bwagurishije myugariro wayo witwa Eric Rutanga mu ikipe ya Police Fc, nyuma yuko aterekeje mu ikipe ya Yanga yo muri Tanzania yamwifuzaga.

Mu minsi yashize Rayon Sports yahaye uburenganzira myugariro wayo kujya mu ikipe yamushakaga yitwa Yanga Africans yo muri Tanzania, abari hafi y’uyu musore batangaje ko bamuhaye urwo rupapuro rumurekura (Release Letter) ariko rwanditseho Yanga.

Ubuyobozi bwa Yanga bwaje gutangaza ko butagikeneye uyu musore, bunamumenyesha ko yakwishakira indi kipe. Uyu musore byaje kuba ngombwa ko asubira muri Rayon Sports gushaka urundi rupapuro rumurekura ngo ajye muri Police Fc yari yasinyiye mbere.

Babinyujije ku rukuta rwa Twitter uyu munsi, Rayon Sports yatangaje ko binyuze mu bwumvikane na Police Fc bagurishije uyu mukinnyi muri iyi kipe y’abashinzwe umutekano.

Bagize bati: “Nyuma y’ubwumvikane bw’impande zombi, Rayon Sports na Police Fc, Rayon yagurishije Rutanga Eric mu ikipe ya Police Fc. Tumushimiye imyaka itatu yamaranye natwe.”

Rutanga Eric yasinye imyaka ibiri muri Police FC ahabwa miliyoni 15 Frw. Uyu mukinnyi yasabye Ikipe y’Abashinzwe Umutekano ko naramuka abonye ikipe hanze mbere y’uko umwaka w’imikino utangira, azayisubiza ibyo yamuhaye akayerekezamo.

Rutanga yari yarasinye muri Police Fc

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO