Robert Pack wakinnye muri NBA yatangiye akazi nk’umutoza mushya wa REG BBC

Robert John Pack Jr wakiniye amakipe atandukanye yo muri shampiyona ya Basketball muri Leta Zunze Ubumwe za Amerika, NBA, nyuma yo kugirwa umutoza mukuru wa REG BBC yatangiye akazi yitegura BAL 2022.

Kumunsi wejo nibwo yakoresheje imyitozo ye ya mbere nk’umutoza mukuru wa REG BBC, aho azungirizwa na Henry Mwinuka wari usanzwe ari umutoza mukuru w’iyi kipe.

Robert Pack w’imyaka 53 yavukiye mu mujyi wa Louisiana muri Leta Zunze Ubumwe za Amerika, aho yakiniye amakipe yo muri NBA arimo: Portland Trail Blazers, Denver Nuggets, Washington Wizards, Brooklyn Nets, Dallas Mavericks, Timberwolves, ndetse na New Orleans Hornets.

Mu 2005 nibwo yahagaritse gukina nyuma y’imyaka 14 abikora nk’uwabigize umwuga, ahita akomereza mu mwuga wo gutoza yatangiriye muri New Orleans Hornets nk’umutoza wungirije kuva muri 2009 kugeza 2010.

Nyuma yaje guca mu makipe nka Los Angeles Clippers, Oklahoma City Thunder, Pelicans, na Washington Wizards aherutsemo.

Aya makipe yose yatojemo nk’umutoza wungirije, dore ko REG BBC ariyo kipe ya mbere abereye umutoza mukuru kuva yatangira uyu mwuga.

REG BBC izahagararira U Rwanda mu irushanwa rya BAL rizatangira tariki ya 5 Werurwe 2022, iyi kipe ikaba iherereye mu itsinda rya mbere ’Sahara Conference’ iri kumwe na US Monastir (Tunisia), AS Salé (Maroc), SLAC (Guinée), DUC (Sénégal), na CFV-Beira (Mozambique).

Iyi kipe ya REG BBC kandi imaze gusinyisha abakinnyi batandukanye izifashisha muri BAL 2022 barimo Mukama Jean-Victor, Axel Mpoyo, Ndizeye Dieudonne na Pitchou Kambuy Manga.


Robert John Pack yakiniye Denver Nuggets yo muri NBA


REG BBC ikomeje imyitozo yitegura irushanwa rya BAL rizatangira muri Werurwe 2022


Pitchou Kambuy wigeze gukinira APR BBC, ari mu bakinnyi bashya REG BBC yibitseho

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO