Rugamba Sipiriyani nk’umurinzi w’igihango akwiye kugirwa umutagatifu

Umurinzi w’igihango Rugamba Sipiriyani yabereye urugero ndi umunyarwanda, yimakaje indangagaciro z’umuco nyarwanda apfundika ipfundo ry’ubupfura. Ibikorwa benshi bemezako bikwiye kumugira umutagatifu.

Rugamba Sipiriyani binyuze mu bikorwa bye byiganjemo ibihangano yakunze kugaragaza ko agaciro k’umuntu ari we ubwe, agahamya ko Atari ubwoko bwe cyangwa se aho akomoka.

Rugamba Sipiriyani, abicishije mu bihangano bye nk’umuntu ni nk’undi, umurage w’intore, inda nini muyime amayira, ntumpeho, umuti w’ubutindi yabaye urugero rwiza kuri ndi Umunyarwanda.

Yakanguriye Abanyarwanda indangagaciro z’umuco nyarwanda apfundika ipfundo ry’ubupfura bukuza ubumuntu mu bantu; yakeburaga Abayobozi abatoza kurangwa n’imiyoborere izira ruswa, amacakubiri no kwigwizaho ibyarubanda.

Abazi Rugamba Sipiriyani bahamya ko kugeza ku itariki 07 Mata 1994 umunsi yatabarutseho yabereye urugero Ndi Umunyarwanda kuko ari mu bantu barwanyije iyandikwa ry’ubwoko mu ndangamuntu kuko yabonaga bigamije ivangura kandi abantu bose yarabafataga kimwe akabaha uburenganzira bungana.

Yanasabye ko ibitangazamakuru bibiba urwango mu Banyarwanda bihagarikwa.
Soeur Uwamariya Immaculée ukora mu ishuri ry’ababikira b’Abarenaridini i Kansi mu Karere ka Huye ni umwe mu babanye n’Umuryango wa Rugamba Sipiriyani avuga ko yabaye urugero rwiza.

Ahamya ko n’igihe Abayobozi bakuru bamusabaga kwitabira ibikorwa bya Politiki birimo nko kujya mu mashyaka akabyanga kuko yabonaga byiganjemo ivangura, itonesha n’icyenewabo, ahubwo agatinyuka kubabwira ko ibyo bakora ari bibi.

Ngarambe François Xavier, Umuyobozi w’Umuryango wa “Communauté de l’Emmanuel” washinzwe na Rugamba, avuga ko ibikorwa bya Rugamba Sipiriyani abibona nko guhanura kuko ngo hari byinshi yagiye avuga nyuma bikaza kubaho.
Aha atanga urugero nk’ivanwa ry’ubwoko mu ndangamuntu z’Abanyarwanda kikaba kimwe mu byo yifuzaga ubu bikaba byarakozwe.

Agira ati “Rugamba yari Umuhanuzi kuko hari ibyo yavugaga wajya kubona nyuma ukabona birabaye, niyo mpamvu twamufata nk’Umuhanuzi”.

Rugamba Sipiriyani nk’Umuhanuzi wabonaga ko Igihugu kizabamo amahano ya Jenoside yasize ahanze indirimbo “Umurage w’Intore”, umuntu yavuga ko yasabaga abazarokoka kuzarangwa n’Umutima wo kubabaria bakiyunga n’abahemukiye.

Muri iyo ndirimbo yasabaga ko urukundo ruzira amacakubiri rukwiye gushyirwa imbere kandi mu gihe habonetse abakoze amakosa mu Banyarwanda hakabaho guhana no kugorora abakoze amakosa kandi ko bitinda bakagororoka bakavamo abantu bazima.

Uwari umuririmbyi muri Korari Rugamba, Bwana Kayigumire Albert yagaragaje ko ibikorwa bya Rugamba bikomeje gufasha benshi mu komorana ibikomere, no kubaka ubwizerane mu Banyarwanda bishingiye ku kwicuza, gusaba imbabazi no kuzitanga, kuvuga ukuri no kubaka icyizere cy’ejo hazaza.

Yagize ati “Ubu twigisha abantu uburyo bwo komorana ibikomere, kumva ko abantu bakoze ibyaha bya Jenoside bakwiye kubohoka bakavugisha ukuri, bakemera gusaba imbabazi kandi abo bahemukiye nabo bakemera kuzitanga kugira ngo nabo babashe kubohoka”.

Soeur Uwamariya Immaculée, ashingiye ku bikorwa byabo, avuga ko urugero rwabo rwiza rukwiye kuba ikitegererezo ku bafitanye amakimbirane bakishakamo ibisubizo byo kuyakemura.

Ngarambe François Xavier, Umuyobozi w’Umuryango wa “Communauté de l’Emmanuel” agaragaza ko ibikorwa bya Rugamba byabereye benshi urumuri ku buryo akwiye kugirwa Umutagatifu ari nabyo biri kwigwaho kandi hari icyizere cy’uko bizashoboka.

Umurinzi w’Igihango RUGAMBA Sipiriyani n’umugore we MUKANSANGA Dafrosa
Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO