Rurageretse hagati y’abahanzi babiri, barapfa indirimbo yakozwe muri 2007 indi muri 2020

Umuhanzi ukizamuka Gihoza Credo Santos [Credo] arahakana iby’uko yaba yaribye indirimbo “Umutako utanaze” aherutse gushyirira hanze amajwi n’amashusho, ibi bije nyuma y’uko hari umuhanzi witwa Icyusa cy’Ingenzi Tchatching umushinja kumutwara iyi ndirimbo akavuga ko iri kuri Album yasohoye mu 2007, kandi ko afite ibimenyetso n’abagabo bo kubihamya.

Iyi ndirimbo yabanje gushyirwa ku rubuga rwa Youtube n’umuhanzi Credo, ku wa 12 Kanama imaze kurebwa n’abarenga ibihumbi Birindwi 2020. Ni mu gihe umuhanzi Icyusa cy’Ingenzi yayishyizeho, ku wa 11 Nzeri 2020, imaze kurebwa n’abarenga Magana atandatu.

‘Umutako utanaze’ ya Credo yatunganyijwe mu buryo bw’amajwi na Producer Madebeats n’aho ‘Umutako utanaze’ ya Icyusa cy’Ingenzi yakozwe na Producer Aaron Nitunga ubarizwa i Burayi.

Izi ndirimbo zombi zitandukanyijwe n’ikivugo cya Credo mu ndirimbo ye, ariko amagambo kuva ku munota wa mbere kugeza ku munota wa nyuma arasa. Kandi zose ni gakondo.

Mu kiganiro kihariye GENESIS TV/BIZZ twagiranye na Credo yaduhakaniye iby’uko yaba yaribye iyi ndirimbo, avuga ko atiyumvisha ukuntu umuntu wamwiba indirimbo utanamuzi.

Yagize ati” ibyo bintu nabimeye kwa Gatanu akimara kuyishyira kuri youtube, numva birantunguye cyane si numva ukuntu naba naramwibye indirimbo ntamuzi rwose”.

GENESIS TV/BIZZ twagerageje kuvugana n’uyu muhanzi Icyusa usanzwe uba mu mahanga ariko ubu uri mu Rwanda adutangariza byinshi, avuga ko we nubwo uyu muhanzi Credo yirengagiza ko yamwibye indirimbo ariko nawe azi ukuri.

Yagize ati” uriya mwana wenda nanjye ndamwumva, ashobora kuba yarayumvise akayikunda, abantu bakamubwira ko yabasha kuyiririmba hanyuma akajya muri studio akayisubiramo, ikibabaje n’uko adashaka kubyemera ahubwo akamparabika ko arinjye wamwibye indirimbo”.

Yakomeje ati” iriya ndirimbo yariri kuri album yanjye mu 2007 nayikoreye igitaramo, ndayicuruza yewe na Cecile Kayirebwa yarayikunze ayinjyanira mu gihugu cy’Ububiligi, nshobora kuba nararangaye sinyishyire kuri youtube aho tuyimenyeye ariko ibyo ntibikuraho ko indirimbo ariyanjye”.


Urebye kuri iyi foto ku mwanya wa Kabiri urabonaho indirimbo "Umutako utanaze" iyi ni ifoto ya album ya Icyusa yakoze mu 2007

Amategeko agiye kwiyambazwa

Icyusa cy’Ingenzi na Credo bahuriye ku Ikigo cy’Igihugu cy’Iterambere (RDB) bagiye kwandikisha iyi ndirimbo. Bombi ntibari baziranye.

Credo avuga ko ari indirimbo ye ya mbere kandi yiteguye kunyura mu nzira zose ariko agasubizwa uburenganzira bwe ku ndirimbo.

Yagize ati” Kwa mbere tariki 15 twahuriye kuri RDB tugiye kwandikisha indirimbo, ariko birangira nta numwe uyandikishije kuko basanze ibihangano bisa, batubwira ko twakumvikana tukishakamo nyir’indiirmbo ariko twaramubuze ubwo tuziyambaza amategeko”

Icyusa nawe avuga ko koko bahuriye kuri RDB uwari ushinzwe kubafasha akababwira ko bagomba kumvikana kugira ngo haboneke nyir’indiirimbo ariko birananirana, bityo akaba yariyambaje amategeko.

Yagize ati” iby’amategeko byo ubu niyo nzira ninaho bigeze kuko batashatse kumvikana, kandi n’ubu bakaba bagitsimbaraye ko arinjye wabibye indirimbo kandi bazi neza ko Atari iyabo dutegereje amategeko rero”.

Icyusa cy’Ingenzi ni umuhanzi uririmba Gakondo. Yataramye mu bitaramo bihuza abanyarwanda muri Washington D.C yahuriyemo na The Ben n’ibindi, nkuko abyivugira. Hari ibitaramo yakoreye i Montreal, Quebec, Ottawa, Toronto… Hari n’ibindi yagiye ahuriramo n’abahanzi barimo Samputu, Kayirebwa, Muyango n’abandi.

Credo Santos Gihoza ni umuhanzi ukizamuka, Umutako utanaze niyo ndirimbo yari akoze bwa mbere ndetse yari imaze kumuha n’izina ritari rito, abantu baratangajwe n’impano ye.

Itegeko no 31/2009 ryo kuwa 26/10/2009, rigamije kurengera umutungo bwite mu by’ubwenge, mu ngingo yaryo ya 164, riteganya ibihano ku cyaha cy’iyigana ry’uburenganzira bw’umuhanzi n’ubushamikiyeho.

Ibyo bihano ni igifungo cy’imyaka kuva kuri itanu kugeza ku 10 n’ihazabu y’amafaranga y’u Rwanda kuva kuri miliyoni eshanu, kugera kuri miliyoni cumi cyangwa kimwe muri ibyo bihano. Iri tegeko ritandukanya ibihano bitewe n’icyiganwe.


Icyusa cy’ingenzi


Credo Gihoza

REBA HANO INDIRIMBO ABA BAHANZI BARI GUPFA

Umutako utanaze ya Icyusa cy’Ingenzi

Mutako Utanaze ya Credo Gihoza

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO