Rutahizamu Erling Braut Haaland yavuze ko nyuma y’iminsi icumi ari buhishure ikipe agomba kwerekezamo

Uyu rutahizamu w’imyaka 21 y’amavuko usanzwe ukinira ikipe ya Borussia Dortmund kuri ubu amakipe arimo Manchester City, FC Barcelona, Real Madrid yose ategereje umwanzuro ugomba gufatwa n’uyu mukinnyi nyuma y’iminsi 10 dore ko amasezerano y’uyu mugabo yagombaga kugeza mu mwaka wa 2024 ariko akaza gusaba ko ikipe ye yamurekura akigendera.

Amasezerano y’uyu mugabo avuga ko ikipe yose imwifuza igomba kuzana miliyoni 63 z’amayero nk’uko amasezerano y’uyu mukinnyi abivuga.

Gusa nta kipe n’imwe mu zirimo kumwifuza yizeye neza ko igomba kumwegukana dore ko uyu mukinnyi atari yatangaza aho agiye kwerekeza.

Nk’uko ikinyamakuru cya BBC kibitangaza amakipe yose akomeje kumwemerera ibintu bimeze kimwe kuburyo uyu mukinnyi nawe ataratangaza aho agomba kwerekeza muri iyi mpeshyi.

Buri kipe yose irimo kwegera uyu musore ikamwereka umushinga w’uburyo azakinishwa, ibyo azahembwa n’ibindi bitandukanye gusa uyu musore we ntarabasha guhitamo aho agomba kwerekeza.

Ikipe ya Real Madrid irimo gufata uyu mukinnyi nk’amahitamo yabo y’ibanze gusa ku rundi ruhande iyi kipe inateganya no gusinyisha Kylian Mbappe naho Barcelona n’ikipe ya Manchester City zo zikomeje gufata uyu mukinnyi nk’amakiriro yazo.

Gusa Manchester City niyo irimo guhabwa amahirwe menshi yo kwegukana uno mukinnyi ukiri muto cyane.

Uyu mukinnyi ukomoka mu gihugu cya Norvege amaze gutsindira ikipe ya Borussia Dortmund ibitego 23 mu mikino 22 muri uyu mwaka w’imikino ndetse akomeje kuba umunyabigwi muri iyi kipe nyuma yo kuyisinyira mu mwaka wa 2020 avuye mu ikipe ya Salzburg.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO