Kagere Meddy yasobanuye iby’umubano we n’umutoza utakimubanza mu kibuga

Rutahizamu w’umunyarwanda Kagere Meddy ukina mu gihugu cya Tanzania mu ikipe ya Simba Sports Club, yatangaje ko ntakibazo afitanye n’umutoza we, nyuma yuko amaze iminsi atabanza mu kibuga.

Kagere Meddy aherutse gukora amateka n’ikipe ye ya Simba maze yegukana igikombe cya kane cya shampiyona kikurikiranya, harimo bibiri yatwaranye n’iyi kipe.

Mu kiganiro gito yagiranye na Genesis Tv, uyu musore yavuze ko ntakibazo afitanye n’umutoza mukuru w’iyi kipe udakunda kumukinisha.

Ati “Ntakibazo mfitanye nawe, nishimiye kuba twabonye insinzi (Ku mukino wa Yanga) watumye tubona itike yo kugera ku mukino wa nyuma w’igikombe cy’igihugu.”

Ku munsi w’ejo ku cyumweru tariki 12 Nyakanga, ubwo ikipe ye ya Simba yakinaga na Yanga, uyu musore yakinnye iminota 23 yonyine, ubwo yaje asimbuye ku munota wa 67.

Kuva Sven Vandenbroeck yafata ikipe ya Simba mu 2019 mu kwezi kwa Ugushyingo, ntiyakunze gukoresha cyane Kagere Meddy amubanje mu kibuga, hari abandi bakinnyi batandukanye barimo kapiteni w’iyi kipe John Bocco ndetse n’abandi ba rutahizamu.

Kuri ubu uyu rutahizamu wageze muri Tanzania mu mwaka wa 2018, niwe ufite ibitego byinshi kuko afite 19.

Mu 2019 mu kwezi kwa Kamena nibwo Kagere Meddy yongereye muri Simba Sports Club amasezerano yandi y’imyaka ibiri, azamugeza mu mwaka w’imikino wa 2021/2022.

Kagere Meddy yakiniye amakipe atandukanye arimo Atraco ya hano mu Rwanda, Kiyovu Sport, Mukura Vs, Police, Rayon Sports ndetse na Gormahia aho yageze muri iyi kipe avuye muri Albania mu ikipe yitwa Tirana Fc.


Ikipe ya Simba yegukanye igikombe cya Shampiyona yo muri Tanzania uyu mwaka


Kagere Meddy avuga ko ntakibazo afitanye n’umutoza we

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO