Rwanda Movie Awards yahinduye izina ubu nabo kuri YouTube bazahatana

Ibihembo bishyigikira sinema Nyarwanda byari bisanzwe byitwa ‘Rwanda Movie Awards’ byahinduye izina mu rwego rwo kwagura imipaka, bihinduka ‘Rwanda International Movie Awards’ bigiye kuba ku nshuro ya 7 muri uyu mwaka.

Ibi ni ibihembo bisanzwe bitegurwa n’ikigo gikora ibijyanye na sinema Nyarwanda ‘Ishusho Arts’, aho ikiciro cya mbere cy’ibi bihembo cyabaye mu mwaka wa 2012.

Mu kiganiro Genesisbizz yagiranye n’umuyobozi wa Ishusho Arts isanzwe itegura ikanatanga ibi bihembo, Mucyo Jackson yadutangarije ko iyi Rwanda International Movie Awards iba irimo ibice bitandukanye.

Mucyo yagize ati: “ibi bihembo bibanzirizwa n’icyumweru cya ‘Rwanda Movie Week’ ifasha abakizamuka muri uru ruganda rwa sinema kumenyekanisha ibikorwa byabo, hakaniyongeraho gukora ibikorwa bihuza aba sineaste n’abaturage, ntago iba igamije gukora ibirori gusa.”

Mucyo yongeraho ko iki cyumweru kiba kigamije kwicara bakareba aho uyu mwuga ugeze mu kwagura ibi bikorwa bikava kuba ibya hano gusa, ahubwo bikagera no ku rwego mpuzamahanga, bijyanirana n’uburyo bwo kwinjiza amafaranga ku bihangano birebwa mu mahanga.


Abari umwanya mwiza wo guhabwa ibihembo ku bakinnyi n’abategura filime
Ubusanzwe Rwanda International Movie Awards iba buri mwaka, aho iyo muri uyu mwaka ifite agashya ko kuzatanga ibihembo no ku bateza imbere uyu mwuga babarizwa muri aka karere ka Afurika y’Iburasirazuba, ari nayo mpamvu yabaye mpuzamahanga.

Muri ibi bihembo, harimo icyiciro kimwe cyahurijwe hamwe cyiswe (people’s choice) gihuriwemo n’abagabo n’abagore, aho cyatoranyijwe hagendewe cyane ku bakunzwe muri uyu mwuga wa sinema muri uyu mwaka, gusa ibindi byiciro bikaba bizagenwa n’abakemurampaka.

Icyiciro cy’abagabo (People’s choice) harimo:
Uwihoreye Jean Bosco
Kamanzi Didier
Niyitegeka Gratien
Ngabo Leo
Benimana Ramadhan
Regero Norbert
Mugisha Emmanuel
Kanyabugande Olivier
Kalisa Erneste
Ndayizeye Emmanuel

Icyiciro cy’abagore (People’s choice) harimo:
Uwamahoro Antoinette
Niyomubyeyi Noella
Umutoni Assia
Musanase Laura
Mukayigera Djaria
Mukakamanzi Beatha
Munezero Aline
Bahavu U. Jeanette
Uwamwezi Nadege
Ingabire Pascaline

Mucyo asobanura ko uru rwego rumaze gutera imbere cyane kuva rwashingwa mu mwaka wa 2012, dore ko kuri ubu abari muri uyu mwuga batagikorera mu kavuyo.

Ibi bikaba bigaragazwa no kuba filime zitagishishurwa nk’uko byajyaga bikorwa mbere, aho Mucyo atanga urugero rwa filime yigeze gushyirwa muri ibi bihembo mu mwaka wa 2014, gusa ikaza gukurwamo bitewe n’uko abakemurampaka babonaga hari ahandi yakinwe mu buryo busa neza niyarihari.

Mu cyumweru cyahariwe sinema (Rwanda Movie Week) hazagaragaramo ibikorwa binyuranye birimo kugaragaza filime zo mu Rwanda mu mijyi itandukanye, kujyana abazikina hanze ya Kigali ngo bahure n’abafana babo, kumurika ibyo bakora mu rwego rwo kurushaho kubiteza imbere, ndetse no gukora ibikorwa rusange.

Mu bihembo by’uyu mwaka hazagaragaramo abakinnyi n’abategura filime bo muri aka karere, dore ko harimo n’ibyiciro byihariye nabo bazaba barimo guhatanira nabo mu Rwanda.
Uko ibyiciro bihagaze muri Rwanda International Movie Awards 2020
Filime zizahatanira ibihembo zatangiye koherezwa tariki 15 Mutarama 2020, biteganyijwe ko bizasozwa tariki 15 Gashyantare 2020 aho bikorerwa ku rubuga rw’ikompanyi ishusho arts itegura ibi bihembo.

Ibi bihembo biteganyijwe kuzatangwa tariki 7 Werurwe 2020, muri Kigali Convention Center.

Rwanda Movie Awards yagejejwe ku rwego mpuzamahanga

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO