Salman Khan uzwi cyane muri filimi z’igihinde yari ahasize ubuzima Imana ikinga ukuboko

Ibitangazamakuru bitandukanye byandikirwa mu gihugu cy’Ubuhinde,bitangaza ko icyamamare Salman Khan yari agiye kurasirwa aho atuye bikozwe n’umushoferi wari witwaje imbunda.

Ikinyamakuru Times Network cyatangaje ko umukuru w’amabandi, Lawrence Bishnoi, ukekwaho icyaha cy’ubwicanyi bwa Moose Wala, yohereje umushoferi witwaje intwaro ntoya ihishe mu gikarito cyahinduwe kugira ngo yice Salman Khan.

Bivugwa ko uwo mwicanyi yageze hanze y’urugo rw’uyu mukinnyi wa Filimi kugira ngo amutegereze amwice ariko asubira inyuma.

Uyu mugizi wa nabi witwa Lawrence Bishnoi n’abambari be bakoze iperereza kuri Salman Khan kandi bari bazi ko uyu mukinnyi atajyana n’abashinzwe umutekano iyo asohotse agiye muri siporo ku igare mu gitondo.

Abo bicanyi ngo bari bazi ko uyu mukinnyi wa filimi aricyo gihe cyiza bamwicira nuko bategura umugambi wo kumuhitana.

Icyakora, ku munsi wa nyuma,ubwo uyu mushoferi yari hafi gusohoza umugambi wabo,Salman Khan yari hafi kuva aho yari atuye mu gitondo,gusa umurinzi w’umupolisi wa Mumbai yari ku irembo rye aje kureba Bwana Salman Khan kuko yagombaga kwitabira ibirori bikomeye uwo munsi.

Ntabwo hamenyekanye uko uyu mugambi w’aba bicanyi wavumbuwe gusa iki kinyamakuru cyemeje ko uyu mugabo ukiri ingaragu yari yapangiwe kwicwa.

Uyu Abdul Rashid Salim Salman Khan afite imyaka 56 akaba ari icyamamare muri filimi z’igihinde aho yakunzwe mu zirimo Tere naam,Dabangg,Karan Arjun,Tiger Zinda Hai,Chori Chori Chupke chupke,Muhjse Shaadi Karogi,n’izindi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO