Sekuru wa Nadia Farid, umugore wa Riderman yitabye imana

Ku mugoroba wo ku munsi w’ejo tariki 15 Mata, Sekuru wa Agasaro Nadia Farid Ishmael yitabye imana azize indwara isanzwe.

Umwe mu bantu b’ingenzi mu buzima bwa Agasaro Nadia Farid Ishmael, usanzwe ari umugore w’umuhanzi Riderman yitabye imana ku munsi w’ejo, aho Agasaro mu butumwa bw’akababaro yavuze ko Sekuru atakibarizwa kuri iy’isi y’abazima.

Agasaro Nadia yagize ati: “Umutima wawe w’agatangaza wahagaze gutera… Buri gihe iyo nashakaga gufata icyemezo cy’ingirakamaro ku buzima bwanjye, nahoraga nifuza kumenya icyo ubitekerezaho, ubundi nawe ukabyemera nk’ubufindo uko byakabaye byose… ubundi nkabona kubijyamo nta kubishidikanyaho…”
Agasaro ntawundi yagishaga inama ku myanzuro ikomeye ku buzima bwe uretse Sekuru

Nadia Farid akomeza avuga ko Sekuru agiye umuryango we ukimukeneye, ariko nanone akaba yaramushimiye kuko yagiye gitwari, nyuma y’uko mu buzima bwo mu isi yabanye neza na buri wese wamusangaga.

Agasaro yemeza ko Sekuru yari umubyeyi wihariye, dore ko ibyo bazamwibukiraho ari byinshi byiza, yongeraho ati: “Ndibuka ku isabukuru y’amavuko yawe uko watubwiye ko utegereje ko imana iguhamagara, tukakubwira ko tuzasenga imana ikaturinda ako gahinda kandi ko izatwumva…”

Nadia avuga ko nyuma y’uko Sekuru ababwiye ayo magambo yabasubije ko bazasaba imana ibyo byifuzo byabo, ariko we yumvaga igihe cyo guhamagarwa n’imana kigeze, nyamara bo bakamubwira ko batakwihanganira kumva iryo jambo.

Agasaro akomeza avuga ko Sekuru yagerageje kubasezera n’ubwo kugeza n’ubu batarabyiyumvisha, kuko kugeza ubu bataremera neza ko yitabye imana.
Sekuru wa Nadia yari yateguje umuryango we ko imana igiye kumuhamagara

Agasaro Nadia Farid Ishmael na Gatsinzi Emery [Riderman] babana nk’umugore n’umugabo kuva muri Kanama 2015, mbere yo gushyingiranwa aba bombi bari basanzwe bazwi mu ruhando rw’imyidagaduro mu Rwanda, aho uyu mugore we yari afite ikamba rya Nyampinga wa Kaminuza ya Mount Kenya ry’uwo mwaka, naho umugabo we azwi nk’umuraperi ukomeye muri iki gihugu.

Aba bombi kugeza ubu bamaze kubyarana umwana umwe w’umuhungu bise Eltad bisobanura ‘uwo Imana yishimira cyane,’ akaba yarabonye izuba ku wa Gatanu tariki ya 11 Ukuboza 2015.

Nubwo Agasaro atasobanuye byimbitse ku rupfu rwa Sekuru warukuze cyane mu bigaragara, yazize uburwayi busanzwe bwari bujyanye n’imyaka yarafite.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO