Senderi yasabye abafana be gukomeza kwirinda Coronavirus

Umuhanzi Nzaramba Eric uzwi nka Senderi Hit yatanze impanuro ku bafana be zunganira iza leta y’u Rwanda mu kurushaho guhashya icyorezo cya COVID-19.

Senderi Hit usanzwe ugendana n’ibihe isi iba igezemo, yasabye abafana be bari ku migabane ine y’isi ndetse no mu Rwanda gukomeza kubahiriza gahunda n’inama bagirwa na Minisiteri y’Ubuzima.

Abinyujije ku rukuta rwe rwa Instagram, yagize ati: “Ba Nyarwanda, bafana banjye, ba ny’Afurika, ba nya Burayi, ba ny’Amerika, ba ny’Aziya, mfashe akanya ngo nihanganishe abamaze kwandura iki cyorezo cyugarije isi cya Coronavirus byumwihariko abanyarwanda, ndasaba abafana banjye kubahiriza gahunda za leta na Minisiteri y’Ubuzima.”

Akomeza avuga ko aba bafana be bakagombye gukomeza kugendera mu ntambwe za Nyakubahwa Perezida Paul Kagame uhora ushishikariza abaturarwanda gukaraba intoki neza, kwirinda gusuhuzanya, gusiga hagati y’umuntu n’undi metero imwe ndetse no kudakora ingendo zitaringombwa no kuguma mu ngo.

Sender Hit yemeza ko ibi bikozwe nta kujenjeka, buri wese yarinda mugenzi we ndetse nawe bikamugarukira bityo ntihagire uwanduza undi iyi virusi ya COVID-19.

Mu mpanuro atanga kandi hiyongeramo ubufatanye bw’abanyamadini, abashinzwe umutekano, abahanzi, n’ibyamamare mu ngeri zose ndetse no mubyo buri muntu akora, mugukomeza kurushaho kunga ubumwe.

Senderi Hit yisabiye abafana be gufatanya mu guhashya icyorezo cya COVID-19 bumvira inama za leta y’U Rwanda na Minisiteri y’ubuzima

Kuri ubu, mu Rwanda harabarurwa abasaga 36 bamaze kwandura iyi virusi ya COVID-19, aho bimaze kugaragara ko umubare munini wabanduye iyi virusi ari uw’abantu bagize ingendo mu bihugu byo hanze y’u Rwanda ndetse nabo mu Rwanda bandujwe nabavuye mu mahanga nkuko bitangazwa na Minisiteri y’Ubuzima mu Rwanda.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO