Shyaka yibukije urubyiruko gukomeza gusigasira indangagaciro z’umuco nyarwanda

Minisitiri w’ubutegetsi bw’igihugu, Prof. Shyaka Anasitase yibukije urubyiruko rw’abakorerabushake mu gukumira ibyaha gukomeza gusigasira indangagaciro z’umuco nyarwanda mu byo bakora byose.

Prof.Shyaka Anastase yabigarutseho ubwo yasozaga ku mugaragaro ihuriro rya 4 ry’urubyiruko rw’abakorerabushake mu gukumira ibyaha mu Rwanda.

Ni ihuriro ryabaye kuri uyu wa 23 Mutarama 2020, I Rusororo mu cyumba cy’inama cya Intare Conference arena, Ryahurije hamwe Urubyiruko 1500 rwibumbiye mu Ihuriro ry’Abakorerabushake mu gukumira no kurwanya ibyaha ruhagarariye abandi ruturutse mu turere twose tw’igihugu.

Minisitiri w’Umutekano, Gen. Patrick Nyamvumba wafunguye ku mugaragaro iri huriro yasabye urubyiruko kugera ikirenge mu cy’ababohoye Igihugu bakarangwa n’indangagaciro yo gukunda igihugu kugeza n’aho bakitangira.

Gen Patrick Nyamvumba agaragaza ko mu rugendo muntu agirira hano ku isi atanga umusaruro mwinshi igihe ari urubyiruko kurusha uwo atanga mu myaka y’ubuto cyangwa y’iza bukuru.

Asaba abari muri iyi myaka gukoresha igihe cyabo neza bakorera u Rwanda, basigasira umutekano rufite kuko ari wo musingi w’amajyambere n’iterambere rirambye u Rwanda rwifuza.

Umunyamabanga wa leta muri Minisiteri y’urubyiruko n’umuco, Edouard Bamporiki yavuze ko urubyiruko arirwo musingi w’impinduka n’iterambere ry’igihugu kuko icyo rwiyemeje rugikora kandi rukakigeraho vuba.

Yagize ati: “Kuva na kera na kare urubyiruko nirwo igihugu cyubakiraho kuko ruba rufite imbaraga zo gukora. Murasabwa gukoresha imbaraga zanyu mu gihe cyanyu mukumira ibyaha muharanira umutekano kugira ngo ibikorwa byanyu bizage bihora byibukwa. "

Yibukije urubyiruko ko kuba intwari bihera mu bikorwa by’umuntu agenda akora byiza kandi akabikora atarindiriye imyaka runaka, abagaragariza ko ubwitange n’ubutwari urubyiruko rwabohoye igihugu rwagaragaje bakwiye kubyigiraho bakagera ikirenge mu cyabo bubaka igihugu. Ibyo bakora byose bakabikora bashingiye ku muco no gukurikiza inama nziza bagirwa n’abayobozi.

Umunyamabanga wa leta muri Minisiteri y’urubyiruko n’umuco, Edouard Bamporiki

Umuyobozi mukuru wa Polisi y’u Rwanda IGP Dan Munyuza yavuze ko amasezerano y’ubufatanye hagati ya Polisi y’u Rwanda n’urubyiruko rw’abakorerabushake yashyizweho umukono mu mwaka wa 2015. Uyu munsi mu gihugu hose urubyiruko rw’abakorerabushake rukaba rugera ku bihumbi 380 (380,000).

IGP Dan Munyuza yashimye ibikorwa bitandukanye uru rubyiruko rugenda rufatanyamo na Polisi y’u Rwanda mu kurwanya ibyaha no guteza imbere imibereho myiza y’abaturage.

IGP Dan Munyuza yashimye ibikorwa bitandukanye uru rubyiruko rugenda rufatanyamo na Polisi y’u Rwanda

Minisitiri w’ubutegetsi bw’igihugu, Prof. shyaka asoza ihuriro ngarukamwaka ry’urubyiruko rw’abakorerabushake, yashimiye imikoranire n’ubufatanye bwa Polisi n’uru rubyiruko mu gukumira ibyaha no guteza imbere imibereho myiza y’abaturage.

Yagize ati “60% y’abatuye igihugu cyacu ni urubyiruko. Mukwiye rero kuba umusemburo w’impinduka mu iterambere ry’igihugu cyacu. Mukomeze kurinda ubusugire bw’igihugu muharanira kurinda no kubungabunga iterambere twagezeho.”

Yakomeje agira ati “Mwakoze byinshi byiza byahinduye ubuzima bwa benshi. Ntabwo turagera aho twifuza, urugendo ruracyakomeje twongere imbaraga cyane mu kurwanya impanuka zo mu muhanda, ibiyobyabwenge byugarije urubyiruko, inda ziterwa abangavu n’ihohoterwa rishingiye ku gitsina.”

Yakomeje avuga ko nk’urubyiruko rukwiye gukomeza gusigasira indangagaciro z’umuco nyarwanda mu byo bakora byose.

Minisitiri w’ubutegetsi bw’igihugu Prof. Anastase Shyaka.

Abagize iri huriro ry’urubyiruko rw’abakorerabushake mu gukumira ibyaha, muri rusange bitabira ibikorwa byo guteza imbere ubukungu n’imibereho myiza by’abaturage n’Igihugu, banateza imbere indangagaciro zo gukunda Igihugu n’ubumwe bw’abanyarwanda.

Kuri ubu mu gihugu hose habarurwa abagize iri huriro ry’urubyiruko rw’abakorerabushake mu gukumira ibyaha barenga ibihumbi 200, iri huriro rikaba ryaratangijwe mu 2015.

Mu bikorwa bishimira ko bagezeho mu mwaka ushize wa 2019 birimo gutunganya imirima y’ibikoni irenga 1300, ubwiherero 1923, bubatse inzu z’abatishoboye 391, bubaka imihanda y’imigenderano ireshya na kilometero 701 ndetse n’ibindi.

Kuri ubu mu gihugu hose habarurwa abagize iri huriro ry’urubyiruko rw’abakorerabushake mu gukumira ibyaha barenga ibihumbi 200
Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO