Sobanukirwa byinshi ku munsi w’intwari z’u Rwanda

Buri mwaka tariki 1 Gashyantare U Rwanda rwizihiza umunsi w’intwari, Ni umunsi hibukwa abakoze ibikorwa by’indashyikirwa kuburyo hari n’abemeye guhara amagara yabo kubw’igihugu. Muri iyi nkuru tugiye kugaruka ku by’iciro by’intwari z’u Rwanda n’ibigenderwaho kugirango umuntu abe intwari.

Kuba intwari si itegeko ahubwo ni amahitamo umuntu yihitiramo ubwe.

Kugirango ube intwari ntibigusaba kuba warapfuye, kuko zimwe mu ntwari z’u Rwanda ziracyariho ariko izindi zaratabarutse.

Intwari z’u Rwanda zigabanyijemo ibyiciro 3 nk’uko tubikesha Urwego rw’igihugu rushinzwe intwari, imidari n’impeta by’ishimwe (CHENO) CHANCELLERY FOR HEROES, NATIONAL ORDERS AND DECORATIONS OF HONOUR. Ibi byiciro biteye kuburyo bukurikira:
.Imanzi
.Imena
.Ingenzi

Imanzi.

Mu kiciro cy’imanzi dusangamo abakoze ibikorwa by’indashyikirwa mu kwitangira igihugu. Muri iki kiciro hashyirwamo intwari zitakiriho.

Aha niho hari umusirikare utazwi izina , uyu akaba ari ingabo ihagarariye izindi zaguye ku rugamba ziharanira ubusugire bw’igihugu yaba mu bihe byashize, iby’ubu n’ahazaza. Muri iki kiciro niho hari na Major General Fred Gisa Rwigema.

Uyu yagize uruhare rukomeye ubwo yayoboraga Ingabo zahoze ari iza FPR Inkotanyi mu rugamba rwo kubohora igihugu mu 1990 ndetse yaje kugwa muri uru rugamba.

Maj. Gen Fred Gisa Rwigema

Imena.

Mu kiciro cy’Imena, hasangwa abakoze ibikorwa by’indashyikirwa byagiriye igihugu akamaro. Muri iki kiciro dusangamo Umwami Mutara III Rudahigwa, uyu yategetse u Rwanda kuva mu 1931-1959.

Uyu yagize uruhare rukomeye mu gukuraho ubuhake agabira imbaga nini y’abanyarwanda ndetse ashyiraho ibigega birihira amashuri abana b’abanyarwanda.

Umwami Mutara III Rudahigwa.

Indi ntwari iri mu kiciro cy’Imena ni Rwagasana Michel.

Uyu yabaye umunyamabanga w’Inama nkuru y’Igihugu cy’u Rwanda aba n’Umunyabanga w’Umwami Mutara III Rudahigwa.

Uyu Yabaye umukozi wa Leta Mbiligi muri Teritwari ya Ruanda-Urundi mu Biro bishinzwe abakozi kavukire i Bujumbura.

Uyu yagaragaje umutima wo gukunda abantu no kurwanya Politike y’amacakubiri bituma ahara byose kugeza ku buzima bwe, yanze gukoresha ububasha yahawe ku nyungu ze bwite, ahubwo aharanira ubumwe bw’Abanyarwanda.

Rwagasana Michel..

Indi ntwari dusanga mu kiciro cy’Imena ni Uwiringiyimana Agathe.

Uyu yabaye Minisitiri w’Intebe wa mbere w’umugore kuva ku wa 17 Nyakanga 1993 kugeza ku wa 7 Mata 1994.

Yarwanyije ishyirwa mu bikorwa rya Jenoside yakoreye Abatutsi ndetse aza kwicwa azira ibitekerezo bye.

Uwiringiyimana Agathe.

Indi ntwari dusanga mu kiciro cy’Imena ni Niyitegeka Félicité.

Félicité Yakoze imirimo itandukanye irimo kwigisha, kurera, gucunga umutungo, no gufasha abatishoboye.

Mu mwaka wa 1994 Jenoside yakorewe Abatutsi yamusanze ku Gisenyi aho yiciwe azira ko yarwanye ku Batutsi bihishe mu kigo ashinzwe kuyobora cya Centre Saint Pierre.

Felicite Niyitegeka.

Izindi ntwari zisangwa mu kiciro cy’Imena ni abana b’Inyange.

Iki kiciro tugisangamo abanyeshuri bigaga mu ishuri ryisumbuye ry’Inyange, riri mu karere ka Ngororrero mu ntara y’Iburengerazuba ahahoze ari mu ntara ya Kibuye.

Abagizwe intwari ni abari mu kigo mu ijoro rya tariki 18 Werurwe mu 1997 ubwo abacengezi bateraga iki kigo bagasaba abanyeshuri bo mu wa gatanu no mu wa gatandatu kwivangura bashingiye ku bwoko.

Abanyeshuri basubije bavuga bati “ Twese turi abanyarwanda".

Icyo gihe abacengezi barabarashe bamwe barapfa abandi bararokoka.

Abapfuye hamwe n’abandi 40 barokotse icyo gitero bose ni intwari z’igihugu mu kiciro cy’Imena kuko baharaniye amahame y’ubumwe bw’abanyarwanda kugeza aho bamwe bahasize ubuzima bagerageza kurengera uburenganzira bwa muntu.

Abana b’i Nyange

Ingenzi.

Muri iki kiciro intwari zashyizwemo ntiziratangazwa kuko hakozwe ubushakashatsi bwiga kugirango hazamenyekane abazashyirwamo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO