Sobanukirwa inkingo za koronavirusi zizajya zinyuzwa mu mazuru

Inkingo z’icyorezo cya koronavirusi nyinshi bazitanga mu byiciro bibiri kugirango umubiri w’umuntu ubashe kubaka ubudahangarwa bwuzuye. Gusa bitewe n’uburyo icyorezo cya koronavirusi cyakomeje kwihinduranya bimwe mu bihugu byatangije gahunda yo gutanga inkingo z’icyiciro cya gatatu mu rwego rwo kongerera ubudahangarwa imibiri y’abaturage b’ibyo bihugu.

Aha twavuga nk’igihugu cya Israel cyatangiye gahunda yo gutanga icyiciro cya gatatu cy’inkingo za koronavirusi ku baturage. Amakuru adasanzwe ni uko zimwe muri izi nkingo zizatangwa mu cyiciro cya gatatu harimo n’izizanyuzwa mu mazuru.

Amakuru dukesha urubuga rwa Business Today avuga ko nibura uyu munsi mu nkingo ijana na cumi z’icyorezo cya koronavirusi ziboneka hirya no hino ku isi, umunani muri zo zinyuzwa mu mazuru naho eshatu zikaba zinyobwa nk’umuti usanzwe zinyujijwe mu kanwa.

Gusa muri izi nkingo zose izageze ku cyiciro cya nyuma cy’igerageza ni nkeya. Rumwe mu nkingo zamenyekanye cyane zizakoreshwa mu cyiciro cya gatatu cyo gukingira aho biteganyijwe ko ruzanyuzwa mu mazuru ni urwitwa Bharat Biotech’s nasal COVID-19 vaccine, uru rukingo rwahawe izina ry’impine BBV154.

BBV154 ni urukingo rwa koronavirusi ruzanyuzwa mu mazuru

BBV154 ni urukingo rwakozwe ariko bateganya ko ruzahabwa abantu runyujijwe mu mazuru mu buryo bwo gupuriza nkuko twipurizaho imibavu ihumura twitera.

Uru rukingo rwahawe icyangombwa cyo kuba rwakoreshwa na Washington University iherereye i St Louis, muri Leta zunze ubume za Amerika. Inkingo zicishwa mu mazuru hamwe n’izo kunywa byitezwe ko zizahindura cyane icyiciro cya mbere cy’inkingo za koronavirusi abantu bahabwagwa zinyuze mu rushinge, izi nkingo byitezwe ko zizahita zitanga ubwirinzi ku mubiri mu buryo bwihuse kandi zikarinda kwandura cyangwa kwanduza icyorezo cya koronavirusi ku ijanisha ryo hejuru cyane ugereranyije n’inkingo zitangwa zinyuze mu nshinge.

Gutanga izi nkingo zizanyuzwa mu mazuru ntibizasaba inzobere zahuguriwe gutanga inkingo kuko bizaba byoroshye kuzihabwa, izi nkingo nta ngaruka zizaba zifite ku kuba zagutera amavunane ngo wumve wavunaguritse ndetse ikirenze ibyo ni uko izi nkingo zizaba ari nziza cyane ku bana bato kuko batinya inshinge ndetse nanone zikaba nziza ku bantu bari mu za bukuru bashobora kugirwaho ingaruka no guterwa inshinge ndetse izi nkingo zikaba zishobora kuba zakorwa mu ngano nyinshi ugereranyije n’izindi duhabwa binyuze mu rushinge.

Urukingo BBV154 ruzaba ari rwiza ku bana n’abantu bari mu zabukuru bashobora kugirwaho ingaruka n’inshinge.

Uru rukingo rwiswe BBV154 sirwo rwonyine ruri kugeragezwa kuba rwatangira gukoreshwa mu minsi iri imbere, ahubwo kaminuza ya Oxford nayo iri gukora icyiciro cya mbere cy’igerageza ry’urukingo ruzatangwa mu nshuro imwe bise AstraZeneca ChAdOx1 nCOV-19.

Iri gerageza ry’uru rukingo riri gukorerwa mu gihugu cy’Ubuhinde ndetse biteganyijwe ko uru rukingo ruzahabwa abakorerabushake 54 bemeye kugeragerezwaho uru rukingo aho bazaruhabwa runyujijwe mu mazuru. Igerageza ry’uru rukingo ryatangiye mu kwezi kwa Mata 2021 ndetse biteganyijwe ko icyiciro cya mbere cy’igerageza ry’uru rukingo cyizarangira mu kwezi kwa Gashyantare 2022.

Kaminuza ya Hongkong, Xiamen na kaminuza ya Beijing Wantai Biological Pharmacy zo mu bushinwa nazo ziri gukora igerageza ry’icyiciro cya kabiri cy’urukingo ruzatangwa inshuro ebyiri runyujijwe mu mazuru muburyo bwo gupuriza, uru rukingo rwiswe (DelNS1-2019-nCoV-RBD-OPT1). Icyiciro cya kabiri cy’igerageza ry’uru rukingo cyakorewe ku bakorerabushake 240 ndetse cyirakomeje aho biteganyijwe ko cyizasozwa hagati mu kwezi k’Ukuboza 2021.

Hari ubundi bwoko bwinshi bw’inkingo ziri gukorwa zizanyuzwa mu mazuru.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO