Symphony Band ngo ntitewe ubwoba n’igitaramo cya Koffi Olomide

Kuri ubu ibitaramo mu Rwanda biri kugenda biba iryaguye, aho abahanzi bakomeye bo ku mugabane wa Afurika bari kuza basimburana kandi bose bakabona n’abantu. Ku bategura ibitaramo ibi ubu ibyo kubura abantu si ikibazo kibahangayikishije.

Nyuma y’abahanzi barimo Omar Lay, Rema, Adekunle Gold, hategerejwe abandi bazahurira mu Rwanda ndetse n’ibitaramo byabo bikabera umunsi umwe. Abo ni Koffi Olomide kuva muri RD Congo na Ric Hassan uzava muri Nigeria.

Aba bahanzi biteganyijwe ko bazataramira mu Rwanda taliki ya 4 Ukuboza 2021. Aho umwe azakorera muri Kigali Arena undi akorere muri Kigali Convention Center.

Habanje gutangazwa igitaramo cya Ric Hassan cyateguwe n’itsinda rya Symphony aho naryo rizatarama muri icyo gitaramo.

Aho abateguye igitaramo cya Koffi basohoreye urupapuro rwamamaza icyo gitaramo abantu batandukanye ku mbuga babigize impaka bavuga ko hari kimwe kizabura abantu bitewe n’uko byashyizwe ku munsi umwe.

Etienne umwe mu bagize Symphony Band avuga ko badatewe ubwoba n’igitaramo cya Koffi Olomide.

Yagize ati “Kuba igitaramo cyabo kizabera umunsi umwe n’icyacu nta na kimwe byaduhungabanyaho kuko twariteguye bihagije kandi nizera Imana ko ariyo igena. Ikindi twe nabo dukora ibintu bitandukanye, buri muntu wese afite ibyo akunda."

Yashimangiye ko abakunzi ba Ric Hassan na Symphony Band batandukanye cyane kuko bamwe bakora injyana ikunzwe n’abantu bakuru abandi bagakora ikunzwe n’urubyiruko rero akaba yizeye ko ibyo bitaramo byose bizitabirwa .

Yakomeje agira ati “Twe kugeza ubu icyo twizeye ni uko uriya mugabo ari umunyabigwi kandi azakora ibintu byiza gusa twe icyo twakwizeza abakunzi bacu ni uko tuzabaha igitaramo kiza kuko aribo dukorera.”

Mu gusoza Etienne yasabye abanyarwanda kutagira ikibazo ku gitaramo cyabo kuko bagiteguye neza.


Abahanzi bazifatanya na Symphony mu gitaramo cyabo


Symphony Band batangaje ko badatewe ubwoba na Koffi Olomide .

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO