TUBIBUKE: Imyaka 4 irashize Gangi na Katauti bitabye Imana

Ndikumana Hamad Katauti na Hategekimana Bonaventure [Gangi] abagabo babiri b’abanyabigwi mu mupira w’amaguru mu Rwanda, bombi bitabye Imana mu ijoro rishyira kuwa Gatatu, tariki 15 Ugushyingo 2017. Imyaka ibaye 4 isi ya siporo mu Rwanda ibuze Abanyabigwi. Tubibuke

Hamad Katauti yavukiye mu Mujyi wa Bujumbura mu Burundi tariki 5 Ukwakira 1978. Ni we mfura mu muryango w’abana batanu; mu mabyiruka ye akaba yarakundaga ruhago ariko mu kuyinjiramo akaba yarakinaga hagati.

Ubwo yakinaga muri Inter FC yo mu Burundi nibwo umutoza yamuhaye inshingano zo gutangira gukina ku ruhande ndetse ngo nibwo yatangiye kwigaragaza nk’umuhanga agakinishwa kuri 2 cyangwa kuri 3 kuko yakinishaga amaguru yombi.

Yavuze ko mu buzima bwe yishimye bidasanzwe umunsi Rayon Sports yatwaye igikombe cya Cecafa muri Zanzibar; mu gihe yakiniraga iyi kipe ngo yashegeshwe bidasanzwe ubwo APR FC yabatsinze ibitego bitatu ku busa gusa ngo ntiyibuka umwaka byabereyemo.

Katauti yakiniye amakipe atandukanye harimo Rayon Sports, amakipe yo ku mugabane w’u Burayi arimo RSC Anderlecht,KV Turnhout, KV Mechelen, KAA Gent yo mu Bubiligi,APOP Kinyras Peyias FC, Nea Salamina, Anorthosis Famagusta FC, AC Omonia na AEL Limassol yo muri Cyprus.

Mu bindi bihe byiza yagize ngo ni mu mwaka wa 2004 ubwo Amavubi yajyaga mu gikombe cy’Afurika cyabereye mu Tunisia, Nkuko yabitangarije Radio Rwanda mbere y’uko yitaba Imana; Yagize ati “Tukimara kubona iyo tike abakinnyi bose twaguye hasi kubera ibyishimo, ni kimwe mu bintu umukinnyi yakwishimira kurusha ibindi byose.”

Icyo gihe yavuze ko abakinnyi yizeraga cyane mu kibuga ku isonga harimo Karekezi Olivier ndetse na Patrick Mafisango witabye Imana mu 2011. Yagize ati “Olivier namugiriraga icyizere cyane na nyakwigendera Mafisango, n’abandi bose uretse ko abo babiri byabaga ari akarusho.”

Yavuze ko akibyiruka yari umusore udashabutse ku buryo yanatinyaga kwegera abakobwa. Yahishuye ko umukobwa bavuganye bwa mbere ni we wamushotoye kugeza ubwo binjiye mu rukundo.

[Yakubise igitwenge] ati “Ikintu cyangoye ni ugutereta kuko nagiraga ubwoba cyane, mu by’ukuri nakundwaga cyane nkiri umwana, ikintu nibuka n’umukobwa wa mbere ni we wateye intambwe ya mbere.”

Kuri Ndikumana Katauti guhuza umupira no guha uburere abana be ngo ntibyigeze bimugora na gato ndetse umwana w’imfura yabyaranye n’umugore bashakanye mbere yamureze imyaka itanu yose ari wenyine.

Yagize ati “Umwe mu bana banjye namureze afite imyaka ibiri, natandukanye na mama we, kuri njye umwana ni nk’uko nkunda umupira. Nkunda umwana hagakurikira umupira […] nta kibazo nigeze ngira na gato cyo kuba narera umwana, namureze njyenyine imyaka itanu, mbere y’uko nongera kurushinga. Ntandukanye n’abandi bagabo benshi, abana kuri njye nta kibazo nigeze ngira.”

Yari afite urwibutso kuri Oprah Uwoya...

Yavuze ko mu myaka 37 yari amaze ku Isi afite ku mutima cyane ibihe yagize mu 2009 ari nabwo yarushinganye n’umukinnyi w’icyamamare muri sinema ya Tanzania, Irene Pancras Uwoya.

Katauti yavuze ko Uwoya akiri umugore we ngo bagiranye ibihe byiza gusa urwibutso amufiteho rw’iteka ngo ni uburyo yamwitagaho, by’umwihariko azirikana cyane uburyo uyu mugore yamuzaniraga icyayi mu buriri.

[Aseka cyane] ati “Icyo ntazapfa nibagiwe, ni ukuntu yamfataga buri gitondo, yanzaniraga icyayi mu gitondo nkiryamye akambyutsa, ni kimwe mu bintu ntazapfa nibagiwe.”

Irene Pancras Uwoya na Hamad Ndikumana ‘Katauti’, ubukwe bwabo bwatashye kuwa 11 Nyakanga 2009 , ibirori byabereye kuri Hoteli ya Giraffe View, iherereye Mbezi Kawe, mu Mujyi wa Dar es Salaam.

Uwoya[uzwi nka Oprah] aheruka gusezerana bwa kabiri n’umuraperi witwa Dogo Janja, Katauti na we yari amaze iminsi ahishuye umukobwa witwa Asma Jesca wo mu Burundi bari bakomezanyije urugendo rw’urukundo. Amakuru yari ahari yavugaga ko biteguraga kurushinga.

Gangi nawe ibigwi bye ntibyoroshye

Hategekimana Bonaventure Gangi yavuze mu 1981, avukana na mushiki we ari abana babiri gusa. Yitabye Imana ku myaka 36 afite umwana umwe w’umukobwa, gusa yari yaratandukanye n’umugore we.

Gangi na we yakiniye amakipe atandukanye arimo APR FC mu 2005, a azenguruka amakipe menshi mu Rwanda arimo Polisi FC, ATRACO, Rayon Sports, Kiyovu Sports, Espoir FC, Marine Fc, Etincelles FC, asoreza muri Musanze FC mu ntangiro z’uyu mwaka ubwo yatakazaga ubushobozi bwo gukina ruhago kubera uburwayi.

Hari n’amakuru avuga ko mu buzima bwe nk’umukinnyi, Hategekimana Gangi atigeze ahusha penaliti mu nshuro zose yagerageje kuzitera mu marushanwa.

Ndikumana Katauti yakiniye Ikipe y’Igihugu Amavubi ndetse ayibera Kapiteni igihe kinini

Hategekimana Bonaventure wamamaye nka Gangi yapfuye azize uburwayi

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO