Top 6: Dore impfu z’amayobera mu byamamare Nyarwanda

Hari abajya bibaza uko bimwe mu byamamare Nyarwanda byitabye imana, bitewe n’uko baba basanzwe bafatwa nk’abantu badasanzwe mu muryango Nyarwanda, bityo benshi bakabiheraho bibaza ukuntu umuntu nk’uwo w’ingirakamaro yakwita imana.

Bitewe n’ubuzima bwiza kandi buryoshye benshi baba babonera inyuma y’amafoto n’utuvidewo tugezweho ibi byamamare biba bigaragaza, ibi bikabafasha kwishakira igikundiro cya rubanda nyamwinshi ruba rwifuza kubaho mu buzima nk’ubwabo.

Muri iyi nkuru tugiye kugaruka ku byamamare byitabye imana mu bihe bitunguranye, aho buri wese atibazaga ko bishoboka.

6. Henry Hirwa

Umuhanzi waririmbaga mu itsinda rya KGB, yari mwene Kayibanda Ladislas na Mukazera Olive, akaba yari yaravutse ku wa karindwi Kamena 1985 (iyaba akiraho yari kuba afite imyaka 34), avukira i Bujumbura mu Burundi. Ni umwana wa kabiri mu bana bane b’uyu muryango. Ni we wari umuhungu wenyine.

Henry yitabye imana ku wa Gatandatu tariki ya mbere Ukuboza 2012, arohamye mu buryo butunguranye mu kiyaga cya Muhazi mu Ntara y’Iburasirazuba aho yari yajyanye na bagenzi be muri Picnic.

Imfura mu muryango we ifite imyaka 37 y’amavuko kuri ubu, n’aho bucura akagira imyaka 27 ari na we Nyampinga w’u Rwanda 2012 Mutesi Aurore.

Henry amashuri abanza yayatangiriye i Burundi aza kuyakomereza i Gikondo ari na ho yayarangirije, naho ayisumbuye yayize kuri Groupe Scolaire Kabuga (APERWA), aza gukomereza i Gikondo ayasoreza kuri APAPE.

Yize umwaka umwe muri Kigali Institute of Management (KIM), aha akaba ari naho yateganyaga gukomereza amashuri ye muri Mutarama 2013 mbere y’uko yitaba imana.

zimwe mu nshuti ze za hafi zirimo na mubyara we zemezaga ko Henry yarangwaga no guseka kandi ko yitondaga. Yongeraho ko yakundaga gutabara bagenzi be, ku buryo yashoboraga no kuba yafata isafari ngo atabare.

Uko yinjiye mu buhanzi

Kwinjira mu buhanzi kwa Henry byatangiye ubwo yabyinaga mu itsinda rya ‘Cool Friends’. Yaje kuza guhura na Skizzy na we wari muri iri tsinda ariko we aririmba, nuko biza kurushaho gukomera ubwo bazaga guhurira mu ishuri rimwe kuri APACE.

Rurangwa Gaston uzwi ku izina rya Skizzy, yakunze gutangaza ko bamaze guhura ari bwo baje kwisangamo impano ndetse babiganiriza na mugenzi wabo MYP bahitamo gushinga itsinda baryita KGB-Kigali Boyz.

Indirimbo ya mbere bakoze yitwaga “Abakobwa b’i Kigali” basohoye mu 2003, Iya nyuma baherukaga gusohora ni iyitwa “Bibi”. Skizzy avuga ko bari bamaze gukora indirimbo zirenga 30.

Nyuma y’aho MYP agiriye muri Leta Zunze Ubumwe za Amerika bari bategereje ko bisuganya bakongera gushyira izindi ndirimbo hanze zirimo iyitwa “Iwacu ni Heza” basubiranyemo na Mani Martin ndetse n’izindi ebyiri zikiri muri ’studio’ zirimo amajwi ya Henry.

Amagambo ye ya nyuma

Iyo urebye ku rubuga rwa Facebook ku rukuta rwe, Henry yanditseho amwe mu magambo agira ati “Ibyo dukora byose bitandukanye gusa tugomba kumenya ko Imana iriho kandi ishobora byose.”

Henry kandi yari yanditse agaragaza ko gutangira ukwezi gusoza umwaka bimushimishije, avuga ko umwaka wa 2012 kuri we wari wagenze neza. Yari yanditse agira ati “Oh! 2012 igendere sinakwangaga; gusa wambereye nziza pee!... ”

5. Alexia Mupende

Mu ijoro ryo kuwa kabiri rishyira kuwa gatatu tariki 09/01/2018 Mu murenge wa Kanombe akarere ka Kicukiro, Alexia Uwera Mupende wari umunyamideri yishwe atewe icyuma.

Alexia Mupende wavutse mu mwaka w’ 1984, akavukira I Nairobi muri Kenya, umuryango wabo warurimo abana batanu, bagizwe n’abakobwa batatu n’abahungu babiri.

Yakomokaga kuri Alex K Mupende na Rose Mupende, Amashuri abanza yari yarayize I Nairobi ayarangiriza I Kigali muri Camp Kigali, naho ayisumbuye ayakomereza muri Kicukiro Academy ahiga umwaka umwe, akomereza ku ishuri Namashagari muri Uganda, arangiriza muri Saint Laurence muri Uganda, ubundi Nyakwigendera Alexia yaje gukomereza Kaminuza mu Rwanda muri Mount Kenya University.

Uwera Alexia Mupenda yatangiye gukora ibijyanye no kwerekana imideri mu Rwanda ahagana mu 2005, atangira kumenyekana mu mwaka wa 2012 aho yatsinze irushanwa rya ‘Rwanda Premier Model Competition’.

Icyo gihe umukozi wakoraga mu rugo iwabo witwaga Niyireba Antoine w’imyaka 23 niwe watungagwa agatoki na benshi, cyane ko yanahise acika, inzego z’umutekano zikaba zaremezaga ko zikomeje kumushakisha.

Uyu munyamideri yababaje benshi, bitangira no guhwihwiswa ko uwamwishe yatawe muri yombi, ariko urukuta rwa twitter rwa polisi y’igihugu rwahise rubeshyuza aya makuru, ruvuga ko ipererereza rigikomeje, bemezaga ko igihe yaba atawe muri yombi bizahita bitangazwa.

4. Rwasa (Nsanzamahoro Denis)

Uwari umukinnyi wa Filimi mu Rwanda, Denis Nsanzamahoro waruzwi cyane nka Rwasa kubera filimi yakinnye, yitabye Imana tariki 05 Nzeli 2019 mu bitaro bya CHUK azize uburwayi bwa Diabetes nk’uko byagiye bigarukwaho.

Denis urupfu rwe rwaratunguranye cyane kuko no mu burwayi bwe, abari babizi bari mbarwa, dore ko yitabye Imana nyuma y’iminsi 4 yari amaze mu bitaro bya CHUK nk’uko bamwe bo mu muryango we babyemezaga.

Ni umwe mu bakinnyi ba filime nyarwanda bari bamaze kwigaragaza ku isoko rya sinema; isura ye yagaragara muri filime ‘100 Days’, “Sakabaka” yagize uruhare mu ikorwa ryayo, ‘Operation Turquoise’ n’izindi nyinshi zamumenyekanishije birushijeho.

Mu 2006 Denis yakinnye muri filime yitwa “The Last King of Scotland” ikaba yari filime ivuga ku buzima n’ubutegetsi bw’umunyagitugu Idi Amin Dada uzwi ku kuba yarategetse igihugu cya Uganda mu myaka ya za 70.

Ni filime igaragaramo abakinnyi b’ibihangange ku isi nka Forest Whitaker ari nawe ukina ari Idi Amin, na Kerry Washington ukina ari umugore we.

Muri Werurwe 2019 Denis Nsanzamahoro [Rwasa] yakinnye muri filime yakozwe ku gitabo cy’umukinnyi wa filime akaba n’umuhanzi Gaël Faye yise “Petit Pays” aho iyi filime imaze n’igihe gito imuritswe.

3. Papy Safa John

Umuhanzi nyarwanda Safari Papy John wamenyekanye cyane mu ndirimbo “Umutima ukunda”, yitabye imana mu ijoro ryo ku wa 12 Ukuboza 2015 azize uburwayi bwa Diabetes bwatunguranye nubwo byavugwaga ko yarasanzwe ayirwara, byanacyetswe ko ariyo yanamuhitanye.

Muri uwo mwaka umufasha wa Papy Safa John yatangaje ko umugabo we yaguye mu bitaro bya Kaminuza bya Kigali bizwi nka CHUK aho yageze amerewe nabi agahita atabaruka.

Safari John Papy watangiye gukora umuziki mu 1986 mu itsinda ryitwaga "Les Huit Anges", yakunze gucuranga mu mahoteli yarakomeye cyane mu Rwanda nka Kiyovu, SKY n’ahandi.

Mu mwaka wa 2013 nibwo uyu muhanzi yatangaje ko ahagaritse muzika abitewe n’ibibazo by’ubuzima, anemeza ko umuziki abaye awushyize ku ruhande kugirango ubuzima bwe burusheho kumererwa neza.

2. Vigitoriya Nganyira

Victoria Nganyira Mukantagara umunyamakuru wakoreye Radio Rwanda kuva mu mwaka w’1964 agasezera kumugaragaro mu mwaka wa 2009, yari azwi cyane mu Biganiro bya WARUZIKO, BANA TUGANIRE na JYA MBERE MWARI W’U RWANDA.
yitabye imana mu gitondo cyo kuri uyu wa mbere yitabye Rurema.

Victoria Nganyira wakundaga kwiyita (Vigitoriya Nganyira) yitabye imana tariki 3 Kanama 2010 mu bitaro bya Kanombe mu mujyi wa Kigali.

Icyo gihe umuryango we wabwiye itangazamakuru ko yazize uburwayi ataramaranye igihe, aho yari afite ikibazo cyo kudahumeka neza.

Mu buzima bwe yaranzwe no gukunda akazi cyane, yari yaravukiye mu karere ka KAMONYI mu mwaka w’1940, amashuri abanza ayigira n’ubundi muri aka karere, ayisumbuye aakomereza mu Burengerazuba bw’U Rwanda ku Gisenyi ahitwa i Muramba mu ishuri Nderabarezi.

Vigitoriya Nganyira hari indi mirimo yakoze mbere y’uko aba umunyamakuru, aho yigishije umwaka umwe nyuma y’aho aza gutangira akazi k’itangazamakuru mu mwaka 1964 mu kwezi kwa munani.

Victoria NGANYIRA umaze imyaka icumi yaritabye imana, yasize abana 7 barimo 1 ukora umwuga w’itangazamakuru.

1. Kizito Mihigo

Mu rukerera rwo ku itariki ya 17 Gashyantare 2020, ahagana saa kumi n’imwe, umuhanzi Kizito Mihigo w’imyaka 38 wari ufungiye kuri Sitasiyo ya Polisi i Remera yasanzwe yiyahuye arapfa nk’uko byemejwe na Polisi y’u Rwanda.
Kizito Mihigo yari amaze iminsi itatu muri kasho ya Polisi aho Ubugenzacyaha bwamukurikiranagaho ibyaha birimo kwambuka umupaka mu buryo bunyuranyije n’amategeko ndetse na ruswa.

Itangazo rya Polisi y’U Rwanda ryo ku itariki 15 na 16 Gashyantare 2020 ryavugaga ko Kizito Mihigo, yari yasuwe n’abo mu muryango we, ndetse n’umuhagarariye mu mategeko.

Kizito Mihigo washyinguwe ku munsi w’ejo tariki 22 Gashyantare 2020, aho uku kwiyahura kwe kwatunguranye cyane, dore ko mu minsi ya mbere agifatirwa ku mupaka tariki 13 Gashyantare n’abaturage bo mu Murenge wa Ruheru, Akagari ka Remera, mu karere ka Nyaruguru agiye kwambuka umupaka ngo yerekeze i Burundi atifuzaga kugira icyo avuga nk’uko byemejwe n’urwego rw’Ubugenzacyaha (RIB).

Urutonde rw’ibyamamare byitabye imana mu buryo butunguranye rushobora kuba rurerure bitewe n’imvano yicyabiteye, ni n’aho kandi twakongeraho nk’urwa Dr Vuningoma James wari Umunyamabanga Nshingwabikorwa w’Inteko Nyarwanda y’Ururimi n’Umuco (RALC) nawe uherutse kwitaba imana mu buryo butunguranye.

Dr Vuningoma akaba yaritabye imana tariki 20 Mutarama 2020 mu bitaro byitiriwe Umwami Faisal amaze iminsi avuye kwivuriza mu gihugu cy’Ubuhinde.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO