Tour du Rwanda: Anatoli Budiak yegukanye agace ka gatandatu, Umunyarwanda aza ku mwanya wa gatatu

Umunya-Ukraine, Anatoli Budiak niwe wegukanye agace ka gatandatu ka Tour du Rwanda 2022 kavaga i Musanze kerekeza kuri Kigali Convention Center ku ntera ya kilometero 152, mu gihe Manizabayo Eric yaje ku mwanya wa gatatu.

Kuri uyu wa gatanu, ku isaha ya saa yine za mu gitondo nibwo abakinnyi 76 batangiye agace ka gatandatu mu karere ka Musanze , aho babanje kugenda ibirometero 3.6 mbere yo gutangira kubarirwa ibihe.

Abasiganwa baciye mu bice birimo kuri Base, i Gicumbi, ndetse n’umusozi wa Tetero, aho Nsengimana Jean Bosco wa Benediction Ignite yari ayoboye abandi.

Gusa uyu musore wari kumwe na Mugisha Moïse binjira i Byumba, bombi baje gusigara inyuma ubwo isiganwa ryari rigeze i Kageyo, maze riyoborwa n’abarimo Pierre Rolland, Goldstein na Ourselin.

Bari kuzamuka mu Rugando nibwo Anatoli Budiak yasatiriye bimufasha gutanga abandi ku murongo wo kuri Kigali Convention Centre ahasorejwe agace ka gatandatu, aho yakoresheje amasaha atatu, iminota 35 n’amasegonda 21 anganya ibihe n’umunya-Eritrea Natnael Tesfazion ukinira Drone Hooper - Androni.

Mu gihe umunyarwanda Manizabayo Eric ukinira Benediction Ignite yaje ku mwanya wa gatatu arushwa n’uwa mbere amasegonda atanu.

Ku rutonde rusange, umwambaro w’umuhondo wambawe n’umunya-Eritrea Natnael Tesfazion, aho amaze gukoresha amasaha 17, iminota 33 n’amasegonda 19, arusha Budiak Anatoli amasegonda atandatu.

Umunyarwanda uza hafi ku rutonde rusange ni Manizabayo Eric uri ku mwanya 10 arushwa n’uwa mbere iminota ibiri n’amasegonda 15, naho Muhoza Eric wa 11 arushwa n’uwa mbere iminota ibiri n’amasegonda 25.

Naho Axel Laurance wa B&B Hotels na Mugisha Samuel ukinira ProTouch bamaze kuva mu isiganwa kubera uburwayi.

Iri siganwa rizakomeza ku wa Gatandatu, tariki ya 26 Gashyantare 2022, hakinwa agace ka Karindwi kazahagurukira i Kigali [i Nyamirambo] gasorezwe kuri Mont Kigali ku ntera y’ibirometero 152 na metero 600.


Agace ka gatandatu kegukanwe na Anatoli Budiak


Umwambaro w’umuhondo wafashwe n’umunya-Eritrea Natnael Tesfazion

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO