Tour du Rwanda: Sandy Dujardin yegukanye agace ka kabiri, Umunyarwanda aza ku mwanya wa gatanu

Sandy Dujardin ukinira TotalEnergies yo mu Bufaransa yegukanye Agace ka Kabiri ka Tour du Rwanda 2022 kahagurukiye kuri Stade Amahoro i Remera kagasorezwa i Rwamagana ku ntera y’ibirometero 148.3, mu gihe Umunyarwanda waje hafi ari Uwihiriwe Byiza Renus waje ku mwanya wa gatanu akoresheje ibihe bimwe n’uwa mbere.

Kuri uyu wa mbere Tariki ya 21 Gashyantare 2022, ni bwo hakinwe agace ka kabiri ka Tour du Rwanda (Kigali- Rwamagana), aho abakinnyi 89 baturutse mu makipe 19 ari gukina iri siganwa ry’uyu mwaka babyukiye mu muhanda.

Kuva mu Gatsata kugeza i Rwamagana, abakinnyi bane barimo Abanya-Maroc n’Umwongereza Hayter Leo bayoboye isiganwa , ariko batangiye kuzenguruka intera y’ibirometero 6,5 inshuro 10 mu mujyi wa Rwamagana, byarangiye Sandy Dujardin yegukanye aka gace kuri sprint.

Sandy Dujardin yakoresheje amasaha atatu, iminota 28 n’amasegonda 25 (3 28’25’’), anganya ibihe n’abandi 57, dore ko kuva ku wa mbere kugeza ku wa 58 bakoresheje ibihe bingana.

Umunyarwanda waje ku mwanya wa hafi ni Uwihiriwe Byiza Renus ukinira Team Rwanda, waje ku mwanya wa gatanu.

Ku rutonde rusange nyuma y’uduce tubiri tumaze gukinwa, Umufaransa Geniez Alexandre ukinira TotalEnergies ni we uyoboye n’amasaha atatu, iminota 33 n’amasegonda atandatu, arusha amasegonda atandatu Restrepo Valencia Jhonatan wa Drone Hopper- Androni, mu gihe Sandy Dujardin ari ku mwanya wa gatatu arushwa amasegonda arindwi n’uwa mbere.

Umunyarwanda uza hafi ni Uwihiriwe Byiza Renus, uri ku mwanya wa 22 aho arushwa n’uwa mbere amasegonda 20 gusa.

Iri siganwa rizakomeza kuri uyu wa Kabiri hakinwa agace ka gatatu, aho bazahagurukira i Kigali (MIC Building) berekeza i Rubavu mu ntera y’ibirometero 155.9, ari nako gace karekare muri iri siganwa ry’uyu mwaka.


Sandy Dujardin yegukanye agace ka gatatu ka Tour du Rwanda


Uko bakurikiranye mu gace ka Kigali-Rwamagana


Urutonde rusange ruyobowe na Alexandre Geniez

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO