UKRAINE: Ibihugu bikomeje kugura peteroli y’Uburusiya bizahabwa ibihano nk’abafatanyacyaha mu ntambara

Umujyanama wa perezida wa Ukraine mu bukungu bwana Oleg Ustenko yatangaje ko ibihugu by’Uburayi byakomeje kugura peteroli na gaz by’Uburusiya n’amabanki yose yakomeje guha amafaranga abaherwe bo mu Burusiya ko bijanditse mu byaha by’intambara kandi bazabiryozwa igihe cyose.

Mu kiganiro yagiranye n’ikinyamakuru The Observer, Bwana Oleg yaburiye ibigo byose byafashije Uburusiya gukomeza ibikorwa by’icuruzwa rya peteroli na gaz.

Bwana Oleg yakomeje avuga ko buri wese wagize aho ahurira n’ibi bikorwa, ubutegetsi bwa Ukraine bwabifashe nk’aho bijanditse mu bufatanyacyaha mu byaha by’intambara Uburusiya buri gukora muri Ukraine.

Yakomeje avuga ko Ukraine izageza mu bushinjacyaha aba bantu cyangwa ibigo byose byafashije Uburusiya ndetse byabafata umwaka umwe cyangwa imyaka icumi ariko ngo bazaruhuka ari uko baryojwe ibyaha bakoze.

Yasoje asabira ibihano by’ubukungu bikakaye Uburusiya harimo gufatira imitungo y’abaherwe bakomeye b’Uburusiya nk’abafite amakipe y’umupira n’inyubako zitandukanye ziri ku mugabane w’Uburayi n’ahandi.

Oleg Ustenko Umujyanama mu bukungu wa perezida wa Ukraine.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO