UPDATES: 70 nibo bamaze kwandura Coronavirusi mu Rwanda

Minisiteri y’Ubuzima yatangaje ko mu Rwanda habonetse abandi bantu 10 banduye Coronavirusi (COVID-19), bituma umubare w’abamaze gusangwamo iyi virusi ugera kuri 70.

Kuri iki cyumweru, tariki ya 29 Werurwe 2020, Minisiteri y’ubuzima yatangaje ko abasanganywe ubwandu bushya barimo abaturutse i Dubai muri Leta Zunze Ubumwe z’Abarabu.

Abarwayi basanzwemo Coronavirus biganjemo abavuye hanze y’u Rwanda ndetse bakigera mu Rwanda bahise bashyirwa mu kato.

  • Abantu batandatu baje baturutse Dubai bahita bashyirwa mu kato.
  • Abantu babiri baje baturutse muri Afurika y’Epfo bahita bashyirwa mu kato.
  • Umuntu umwe waje aturutse muri Nigeria ahita ashyirwa mu kato.
  • Umuntu umwe wagize ingendo zitandukanye mu bihugu bya Afurika y’Iburasirazuba, ahita ashyirwa mu kato.

Minisiteri y’Ubuzima yavuze ko “Abarwayi bose barimo kuvurirwa ahantu habugenewe kandi barimo koroherwa. Abenshi muri bo ubu nta bimenyetso bya Coronavirus bagaragaza. Nta n’umwe urembye. Hanashakishijwe abantu bose bahuye nabo kugira ngo basuzumwe ndetse bitabweho n’inzego z’ubuzima.’’

Abanyarwanda bose basabwe gukomeza kwitwararika, ndetse ingamba zashyizweho zikomeje kubahirizwa zirimo ko ibikorwa by’ubucuruzi bitari iby’ibanze bifunzwe, ingendo zihuza imijyi n’uturere birahagaritswe ndetse n’ingendo zitari ngombwa no kuva mu ngo nta mpamvu zihutirwa birabujijwe.

Minisante yashimangiye ko umuntu wese ugeze mu Rwanda azashyirwa mu kato k’iminsi 14 guhera igihe ahagereye, inasaba ubufatanye bwa buri muturarwanda mu gukumira iki cyorezo.

Ibimenyetso bya COVID-19 birimo kugira umuriro, ibicurane, umunaniro n’inkorora ijyana no kubabara mu mihogo, guhumeka bigoranye bishobora kugera aho bitera umusonga nawo ushobora kubyara urupfu.

Ishobora kwandura binyuze mu kuramukanya abantu bahana ibiganza, hakabaho guhererekanya amatembabuzi yaturutse mu myanya y’ubuhumekero y’umuntu wanduye, maze uyakozeho akaza kwikora ku munwa, ku mazuru cyangwa mu maso, agahita yandura. Umuntu ashobora no gukura iyi virusi ku kintu yaguyeho, kandi iyo gikomeye ishobora kumaraho amasaha menshi yagera no ku minsi itatu.

Umuntu ugaragaza ibi bimenyetso asabwa guhamagara ku 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.

Koronavirusi ni icyorezo cyibasiye Isi kuva mu mpera z’umwaka ushize, kikaba kimaze guhitana abantu 33,888 mu gihe abagaragayeho iyi virusi bose hamwe ari 718,173. Abavuwe bagakira ni 150,918.

Igihugu cyapfushije benshi uyu munsi kubera Koronavirusi ni Esipanye yapfushije abantu 820, ikurikiwe n’u Butaliyani bwapfushije abantu 756.

Igihugu gifite umubare munini w’abanduye Koronavirusi ni Leta zunze Ubumwe z’Amerika zifite abantu 139,262, hagakurikiraho u Butaliyani (7,689) mu gihe u Bushinwa iki cyorezo cyahereyeho buri ku mwanya wa Gatatu (81,439).

Muri Afurika y’Iburasirazuba, u Rwanda rukurikiwe na Kenya mu kugira abarwayi benshi, aho Kenya uyu munsi yatangaje abarwayi bashya bane, bivuze ko abagaragayeho iyi virusi muri Kenya bose hamwe ari 40, harimo umwe wavuwe arakira n’uwapfuye.

Hakurikiyeho Uganda ifite umubare rusange w’abantu 33 bagaragayeho ubu burwayi, barimo batatu bagaragaye uyu munsi, na Tanzania yabaruye abarwayi 14 barimo umwe wavuwe agakira. U Burundi na Sudani y’Amajyepfo ntibiratangaza umurwayi n’umwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO