UPDATES: Mu Rwanda 11 bamaze kwandura Coronavirus

Minisiteri y’Ubuzima, yatangaje ko mu Rwanda habonetse abandi barwayi batatu ba Coronavirus barimo umwe ukomoka mu Buhinde mu gihe abandi babiri ari Abanyarwanda; hanatangazwa ingamba nshya zafashwe na Guverinoma mu gukumira ikwirakwira ry’iki cyorezo zirimo ko nta ngendo z’indege z’abagenzi zizongera kuva cyangwa kuza ku butaka bw’u Rwanda mu gihe cy’iminsi 30.

Muri 11 banduye virus ya covid-19 mu Rwanda babiri nibo badaheruka mu mahanga, kimwe n’ahandi henshi muri Afurika iyi ndwara imaze cyane cyane kuboneka kubavuye mu mahanga.

Abanduye Coronavirus bagaragaye kuri uyu wa Gatatu barimo Umuhindekazi w’imyaka 37 wageze mu Rwanda tariki ya 8 Werurwe aturutse mu Mujyi wa Mumbai, washakanye n’umwe mu baherutse kugaragarwaho iyi ndwara mu Rwanda.

Hari n’Umunyarwanda w’imyaka 26 udaherutse ingendo mu mahanga, n’undi mugabo w’Umunyarwanda w’imyaka 45 wageze mu Rwanda tariki 16 Werurwe aturutse mu Bubiligi anyuze i Addis Ababa muri Ethiopia.

Itangazo rya Minisante ryo kuri uyu wa 18 Werurwe 2020 ryo rivuga ko izi ngamba zafashwe zo guhagarika ingezo zo mu ndege zizamara iminsi 30 ishobora kongerwa.

Rigira riti "Mu kurushaho kwirinda ikwirakwiza rya Coronavirus, hahagaritswe ingendo z’indege ziva cyangwa zijya mu Rwanda, harimo na RwandAir, zinyuze ku Kibuga Mpuzamahanga cya Kigali. Ibi bizatangira gukurikizwa guhera tariki ya 20 Werurwe saa Sita z’ijoro.’’

Rikomeza rivuga ko indege zitwara imizigo n’izikora ibikorwa by’ubutabazi zizakomeza gukora nkuko bisanzwe.

Uretse gutangaza imibare y’abanduye Coronavirus, Minisante hari abandi bantu iri gusuzuma biganjemo abahuye n’abanduye.

Coronavirus byemejwe ko yageze mu Rwanda ku wa 14 Werurwe 2020, ubwo yatahurwaga ku Muhinde ukorera rimwe mu mashami y’Umuryango w’Abibumbye mu Rwanda. Kuri ubu umubare w’abarwaye Coronavirus wageze kuri 11, abanduye mbere bari kwitabwaho mu Kigo Nderabuzima cya Kanyinya mu Karere ka Nyarugenge kandi bameze neza.

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu mihogo, guhumeka nabi bishobora no kugera aho itera umusonga no kubuza impyiko gukora bishobora gutera urupfu. Iyi ndwara ishobora kwandura binyuze mu gukora ku muntu uyirwaye, cyane cyane mu kuramukanya abantu bahana ibiganza.

Minisiteri y’Ubuzima yasabye abaturarwanda gukomeza kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi no kwirinda ingendo zitari ngombwa.

Iyi minisiteri yashimangiye ko mu gihe Coronavirus yakomeza gukara, ibyumweru bibiri [kuva ku wa 14 Werurwe 2020] byo guhagarika ibikorwa bihuza abantu benshi byashyizweho mu guhangana nayo bishobora kongerwa.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO