Ububiligi : Imvubu ebyiri zasanzwemo virusi ya covid-19

Imvubu ebyiri zo mu Bubiligi zagaragayeho ibimenyetso bitandukanye birimo kuzana ibimyira byinshi ku mazuru yazo, nyuma zirapimwa zisangwamo virusi ya covid-19 zihita zishyirwa mu kato.

Kugeza uyu munsi abashakashatsi ntibaramenya ahantu imvubu ebyiri zo mu gihugu cy’Ububiligi iyitwa Imani ifite imyaka 14 na Hermien y’imyaka 41 zaba zarahuriye na virusi ya covid-19.

Amakuru dukesha Reuters kuva igihe twateguraga iyi nkuru avuga ko izi mvubu uko ari ebyiri nta bindi bimenyetso bikanganye zifite usibye kugira ibimyira ku mazuru yazo ndetse ntabwo zirembye.

Muganga ushinzwe kwita ku nyamanswa (veterineri) muri parike ibarizwamo izi mvubu witwa Francis Vercammen yavuze ko ari ubwa mbere hagaragara virusi ya covid-19 mu mvubu.

Yagize ati “ Nkurikije ubumenyi bwanjye, Ni ubwa mbere ibi bintu mbibonye muri izi nyamanswa.”

Muri iyi parike izi mvubu zibamo, habarurwa inyamanswa zisaga 5,000 ndetse ubu amabwiriza yo kwirinda icyorezo cya covid-19 yakajijwe ku bantu basura iyi parike kugirango barinde ko hakongera kugaragara ubwandu bwa covid-19 ku zindi nyamanswa.

Twakwibutsa ko icyorezo cya covid-19 cyitagaragaye ku mvubu gusa ahubwo ni kenshi cyagaragaye no ku mbwa, ibisamagwe, ingwe, n’izindi nyamanswa nyinshi zo muri parike.

Ibi byatumye abashakashatsi bibaza uburyo virusi ya covid-19 yaba yarahererekanywe hagati y’abantu n’inyamaswa.

Muri parike y’inyamanswa iherereye i Washington naho mu kwezi kwa Nzeri inyamanswa icyenda nazo zasanzwemo icyorezo cya covid-19.

Icyo gihe intare esheshatu n’ibisamagwe bitatu byasanzwemo virusi ya covid-19 ndetse izi nyamanswa zari zananiwe no kurya inyama zisanzwe zirya.

Mu kwezi kwa Ukwakira, Muri Leta zunze ubumwe za Amerika hemejwe ikoreshwa ry’urukingo rwihariye rwa covid-19 ruhabwa inyamanswa zitandukanye.

Izindi parike zitandukanye nazo hirya no hino ku isi zatangiye gukingira inyamanswa icyorezo cya covid-19.


Igisamagwe gikingirwa Covid-19 mu Bwongereza


Idubu rikingirwa Covid-19 muri Leta zunze ubumwe za Amerika.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO