Ubusesenguzi: Miliyari yahawe Bruce Melodie ishobora kuba igihuha

Taliki 24 Kanama 2021 nibwo hatangajwe amakuru avuga ko umuhanzi Bruce Melodie yasinyanye n’ikigo gicuruza ibiribwa bishingiye ku buhinzi aho azajya acyamamariza bo bakamuha miliyari y’amafaranga y’u Rwanda mugihe cyingana n’imyaka ibiri.

Umuhango wo gusinya aya masezerano yasinyiwe muri Kigali Convention Centre. Umuyobozi w’icyo kigo “Food Bundles Shikama Diescor” yavuze ko bahisemo uyu muhanzi kuko bazi neza ko azabafasha kugera ku bakiriya babo.

Basabye Bruce Melodie ko agomba kubagezaho abahinzi ibihumbi 300 mu gihe ubu bakorana n’ibihumbi 3 ndetse bakazajya babona byibura abakiriya ibihumbi 10 ku munsi.

Nyuma yo kubitangariza imbere y’itangazamakuru ntabwo hanze abantu babyumvise kimwe bitewe n’ibintu abahanzi basigaye biharaje byo kwibeshyera amafaranga bahawe kandi mu byukuri ari intica ntikize.

Aha byagiye biteza impaka ahantu hatandukanye byakarusho bigera no muri Groupe ya Whatsapp mpuriyemo n’abandi bantu banyuranye haba ababarizwa mu ruganda rw’imyidagaduro n’abandi bashoramari batandukanye.

Umwe mu bashoramari duhuriye muri urwo rubuga yahise anyandikira ambwira ko afite amakuru yizewe kuko nawe yigeze kujya mu biganiro niyo Kompanyi yasinyishije Bruce Melodie.

Yibajije ibibazo bitatu ati:

1 . None se ko bahamagaje Ikiganiro n’itangazamakuru (Press Conference) ngo basinye bigeze basinya?

2 . Muri Business ujya gutanga Miliyali ari uko byibuze usigaranye izindi nka 100.

3 . Iriya company ifite igishoro kingana gute ku buryo yatanga miliyali?

Ibi ni ibyo yambajije nk’umunyamakuru Ati “Ibi ni akazi muba mugomba gukora kugirango mukure abaturage mu rujijo kuko biriya bintu by’abahanzi byo kubeshya abaturage birakabije rwose. Ese koko niba bayahabwa bibamariye iki ko mbona ntacyo bihindura kigaragara cyangwa gifatika mu mibereho yabo?.”

Uyu muntu utarifuje ko amazina ye atangazwa yavuze ko ibi bintu yibaza hari n’abandi benshi bakomeje kubyibaza.

Ati “Ariko ukuri guhari ni uko bemereye Melodie kuzamuha ariya mafaranga mu myaka iri imbere nawe atazi. Kuko baramuhamagaye bamwereka umushinga (project) ndende ko ashobora kuzabonamo ayo mafaranga ariko nta cash bamuhaye.”

“Ikindi amakuru ahari ni uko bumvikanye ko bazamuha miliyoni 400 mu gihe runaka Mélodie naba agikomeje kuba agikunzwe nkuko ubu bimeze (Akiri kuri Hit).”

Ubwo Melodie yatangazwaga ko azahabwa ayo mafaranga yari aziko ibi bizavugwa aboneraho kuvuga ko Atari amakabyankuru asanzwe amenyerewe mu ruganda rw’imyidagaduro.

Ati “Ubwo utabyemera ntabwo yifuza ko ntunga amafaranga.”

Food Bundles ni ikigo cy’ubucuruzi gikorera kuri murandasi kigurira umusaruro abahinzi kiwugeza ku isoko.


Melodie avuga ko umuntu utabyemera atamwifuriza gutunga amafaranga

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO