Kiyovu Sports yahakanye ko iri gutegura ibirori byo guhemba abagize uruhare muri Jenoside

Ubuyobozi bw’ikipe ya Kiyovu Sport bwamaganiye kure, bunasaba ibisobanuro ubuyobozi bw’ikigo k’itangazamakuru cya Radio 10, ku byo bamwe mu banyamakuru b’iki gitangazamakuru baherutse gutangaza kuri iyi kipe.

Mu ibaruwa ubuyobozi bwa Kiyovu Sport bwanditse, bwatangaje ko busaba ibisobanuro kubyo aba banyamakuru ba Radio 10 mu gisata k’imikino barimo Sam Karenzi ndetse na Kazungu Clever, batangaje ejo bavuga ko Kiyovu igiye gutegura ibikorwa byo gushimira abagize uruhare muri Genocide yakorewe abatutsi muri Mata 1994.
Dore ibaruwa yandikiwe Ubuyobozi bwa RadioTv10.

Bagize bati: “ Bwana muyobozi mukuru w’igitangazamakuru cya Radio 10,
Tubandikiye tugirango tunyomoze, twihanangirize kandi tunasabe isoko y’inkuru twumvise kuri radio 10 mubereye umuyobozi.

Bwana muyobozi, kuri uyu wambere tariki 31/08/2020 mu kiganiro cya sport cyanyuze kuri radio 10 humvikanye abanyamakuru barimo uwitwa Karenzi Sam na Kazungu Claver bavuga ko Kiyovu sports yateguye igikorwa cyo gushimira abagize uruhare muri Genocide yakorewe Abatutsi mu Rwanda barimo Matayo Ngirumpatse ndetse n’umunyamabanga mukuru wishyaka ryitwaga MRND.

Tumaze kumva ibyo bintu bikomeye bishinjwa ikipe yacu ya Kiyovu sports n’abanyamakuru
muyobora, tubandikiye tubasaba ko ibyo mwabinyomoza bikanyura mu kiganiro gikorwa kuri iyo saha kandi kigahabwa iminota ingana niyo cyahawe icyo gihe nkuko amategeko n’amahame agenga itangazamakuru mu Rwanda abiteganya.

Twongeye kubabazwa no kutareba kure n’ubushishozi buke abanyamakuru bakoresheje muri icyo kiganiro bamamaza genocide yakorewe abatutsi bakiyibagiza inkovu n’ishavu yasize mu banyarwanda n’aba sportif by’umwihariko.

Tuboneyeho kandi kwamagana radio 10 tivivuye inyuma mubiganiro idahwema guhitisha byibasira ubuyobozi bwa kiyovu sports, tukaba tubasabako iyo mikorere yakosorwa bitakorwa hakiyambazwa înzego z’ubutabera n’izireberera itangazamakuru mu Rwanda.
Tuboneyeho murwego kandi rwo gushimangira amahame y’itangazamakuru mu Rwanda kubasaba ko mutumenyesha isoko y’iyi nkuru.

Mugihe tugitegereje igisubizo, tubaye tubashimiye. Murakoze kandi mugire akazi keza.”

Genesis Tv yashatse kuvugana na bamwe barebwa n’iki kibazo, ariko ntibafata telefone ngendanwa, ntibanasubiza ubutumwa bugufi bwabandikiwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO