Kiyovu Sports yasuye Urwibutso rwa Jenoside ku Gisozi

Kuri uyu wa Mbere tariki ya 12 Mata 2021, Ubuyobozi n’Abakinnyi ba Kiyovu Sports basuye urwibutso rwa Jenoside yakorewe Abatutsi rwa Kigali ruri mu murenge wa Gisozi, Akarere ka Gasabo bunamira inzirakarengane zihashyinguye banasobanurirwa amateka y’uko umugambi wo gutsemba Abatutsi wateguwe.

Bakigera ku Gisozi babanje gusobanurirwa byinshi kuri uru rwibutso rushyinguyemo inzirakarengane za Jenoside yakorewe Abatutsi zigera ku bihumbi 250, nyuma bashyize Indabo ku mva bunamira abahashyinguye bakomeza batemberezwa mu Rwibutso birebera uko umugambi wa Jenoside wateguwe.

Nyuma yo gutembera muri uru rwibutso bamwe mu bakinnyi ba Kiyovu ba banyamahanga barangajwe imbere n’umunyanijeriya Samson Babuwa batangaje ko ibyo babonye ku rwibutso biteye ubwoba cyane atiyumvishaga uburemere bwabyo.

Yagize Ati Ati "Ibyabaye mu myaka 27 ishize, byari biteye ubwoba pe, ndashaka gushimira buri wese warwanye kugira ibyo bintu bibi bisigare ari urwibutso gusa, ndashaka gushimira by’umwihariko Perezida Paul Kagame waryanye cyane kugira ngo agarure amahoro muri iki gihugu, ni ikintu cyiza kuko abantu bose ubu bashyize hamwe."

Perezida wa Kiyovu Sports, Mvukiyehe Juvenal avuga ko basuye uru rwibutso nk’ikipe yagizweho ingaruka na Jenoside yakorewe Abatutsi kandi na none bamwe mu banyamuryango bayo bijanditse muri ubu bwicanyi, bityo ko ari no mu rwego rwo gusobanurira abakinnyi ko batagomba kujya mu bindi bikorwa bibi.

Ati "Ni igikorwa twifuza guha agaciro kugira ngo niba turi muri siporo twumve ko tudakwiye kujya mu bindi bikorwa bibi, bityo rero muri Kiyovu Sports twifuje kugira ngo tubimburire abandi basiporitifu duhe agaciro abacu bakorewe Jenoside mu 1994 cyane cyane ko umuryango wa Kiyovu Sports hari abasiporutifu bacu, abakinnyi bacu, abakunzi bacu bazize Jenoside yakorewe Abatutsi mu 1994 kandi hakaba n’abasiporutifu bacu bijanditse muri ibyo ikorwa bibi."

Kuba bagiye ku Rwibutso bakajyana n’abakinnyi b’abanyamahanga batazi amateka y’u Rwanda, avuga ko ari cyo gihe cyiza cyo kugira ngo bamenye amateka y’igihugu bakiniramo bityo bikaba byanafasha no kugira ngo amateka y’u Rwanda akomeze amenyekane no mu bindi bihugu.

Kiyovu yasuye uru rwibutso mu gihe abanyarwanda twibuka Jenoside yakorewe Abatutsi ku nshuro ya 27.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO