Udushya n’impinduka muri Miss Rwanda 2021

Abategura irushanwa ry’ubwiza rya Miss Rwanda batangaje gahunda y’umwaka utaha irimo impinduka nyinshi nko kuba harakuwemo ibintu byo gupima abakobwa ibiro hamwe n’uburebure.

Miss Rwanda ni rimwe mu marushanwa y’ubwiza akurikirwa cyane hano mu Rwanda kuko iyo riri kuba usanga ryihariye imbuga nkoranyambaga hamwe n’itangazamakuru aho buri umwe aba yerekana uwo ashyigikiye.

Kubera ibihe bibi Isi irimo byatewe n’icyorezo cya Covid-19 byatumye n’iri rushanwa ryigizwa inyuma kuko mu myaka yashize ubu ryabaga rigeze aharyoshye.

Rwanda inspirational Back Up iritegura yamaze gushyira hanze bimwe mu bizagenderwaho mu gushaka uzasimbura Ishimwe Naomie wabaye Miss Rwanda 2020.

Zimwe mu mpinduka za 2021…

Uburebure n’ibiro byajyaga bisabwa umukobwa witabira byakuweho. Ubu, umukobwa ugomba kwiyandikisha muri riri rushanwa asabwa kuba ari umunyarwanda, afite imyaka hagati ya 18-28.

Uyu mwaka hazatangwa andi makamba azaba yiyongera kuri aya agiye gutangwa, azaba arimo iry’umushinga ufite agashya ndetse n’uwagaragaje mpano yihariye kurusha bagenzi be.

Abakobwa 20 bazagera mu cyiciro cya nyuma bazahabwa bourse zo kwiga muri kaminuza.
Umukobwa uzahabwa ikamba rya Miss Rwanda 2021, azasinyishwa amasezerano yo gukorera Miss Rwanda Organization nk’umukozi mu gihe cy’umwaka.

Ikindi umukobwa ushaka kwitabira asabwa ni ukuba yararangije amashuri yisumbuye, atarabyaye, afite ubuzima buzira umuze, atarashatse umugabo ariko ashobora kuba yakwambikwa impeta cyangwa se agakundana.

Ingengabihe y’irushanwa igaragaza ko amajonjora y’ibanze azatangirira mu Karere ka Rubavu tariki 09 Mutarama 2021, tariki 16 Mutarama 2021 mu Ntara y’Amajyaruguru mu Karere ka Musanze naho tariki 23 Mutarama 2021 bajye mu Ntara y’Amajyepfo mu Karere ka Huye.

Tariki 30 Mutarama 2021 ijonjora rizabera mu Ntara y’Iburasirazuba mu Karere ka Kayonza naho tariki 06 Gashyantare 2021 hatorwe abo mu Mujyi wa Kigali.

Tariki 20 Gashyantare 2021 nibwo hazatorwa abakowa 20 bazajya mu mwiherero uzabera i Nyamata kuva tariki 07 Werurwe kugera tariki 19 Werurwe 2021.

Tariki 20 Werurwe 2021 nibwo hazaba umuhango wo kwambika ikamba Nyampinga w’u Rwanda 2021 n’ibisonga bye. Ni mu muhango uzabera ku Intare Conference Arena.

Biteganyijwe ko ibindi birenze ibi bizatangazwa ku munsi wo kuwa gatanu taliki ya 11 Ukuboza 2020 mu kiganiro kirambuye bazagirana n’itangazamakuru.


Abaheruka gutorwa kuva muri 2017

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO