Uko sinema nyarwanda yugururiwe amarembo hirya no hino ku isi

Amwe mu mateka yaranze sinema nyarwada nyuma ya Jenoside yakorewe abatutsi mu 1994, agaragaza ko filime nyarwanda ndetse na filime ku Rwanda zubakiye ku nsanganyamatsiko ya jenoside yakorewe Abatutsi zatangiye kwigaragaza ku bwinshi mu gihe Jenoside yari imaze guhagarikwa.

Mu nkuru zacu zatambutse twabagejejeho amwe mu mateka yaranze sinema nyarwada kuva ku mwaduko w’abazungu mu Rwanda, igihe cya repubulika ya mbere ndetse n’iya kabiri.

Kuri ubu tugiye kugaruka kuri amwe mu mateka yaranze sinema nyuma ya Jenoside yakorewe abatutsi mu 1994 kugeza hafi mu mwaka w’2000.

Ni umwanya sinema nyarwanda bigaragara ko yagiye yiyubaka umunsi ku wunda kugeza ubu, ahanini bikaba byaraturutse ku bihe bikomeye bya Jenoside u Rwnda rwari ruvuyemo.

Turifashisha igitabo cya Mwarimu Jean Claude Uwiringiyimana, yise Sinema, aho agaruka kuri bimwe mu byaranze amateka ya sinema nyarwanda.

Jenoside yakorewe Abatutsi igihagarikwa muri Nyakanga 1994, abanyamakuru b’ibitangazamakuru mpuzamahanga bihutiye kuyikoraho filime mpamo.

Urugero ni nka firime mpamo “A Culture of Murder” yakozwe n’umunyamakuru Steve Bradshaw wa BBC Panorama Production ndetse na filime mpamo “The Bloody Tricolor” (1995) aho igaragaza uruhare rw’Ubufaransa mbere ya jenoside.

Iyaje kumenyekana cyane muri icyo gihe ni iya Luc de Heusch (wiyitaga Luc Zangrie) yise “Une République devenue folle Rwanda: 1894-1994”.

Iyi filime mpamo akaba yarayikoze mu w’1996 nyuma y’aho ababajwe cyane n’ibyabaye mu Rwanda dore ko yari azi amateka yarwo kuko mu myaka y’1950 yari mu Rwanda.

Mu buhamya bwe, avuga ko yanahagarutse mu w’1963 mbere gato ya Noheri y’uwo mwaka ubwo hicwaga abiswe “Ibyitso by’inyenzi”.

Luc de Heusch (1927-2012), ni umubiligi wakoze filime mpamo ikubiyemo ubuhamya bw’byo yabonye mu Rwanda yise Une République devenue folle Rwanda: 1894-1994
Luc akomeza avuga ko asubiye mu Bubirigi yamaganye ubwo bwicanyi imbere y’Inteko yitwa Ligue Belge des Droits de l’Homme avuga uruhare rw’abasirikare b’Ababiligi muri ubwo bwicanyi (abo basirikari bakaba bari muri gahunda yo gufasha gutangiza igisirikari cy’u Rwanda).

Gusa ngo yagosoreye mu rucaca, ari na byo byanatumye akora iyo filime nyuma y’imyaka 30 mu rwego rwo gutanga ubuhamya bwe akoresheje filime mpamo ishinja (nk’uko abyivugira).

Mu myaka hagati y’1994 n’1999, bikaba bigaragara ko filime zakozwe mu Rwanda zari zifitanye isano na jenoside yakorewe Abatutsi ndetse zose muri rusange ari “filime mpamo” (documentary films). Ikigaragara kandi ni uko inyinshi zakozwe n’Abanyamamakuru by’umwihariko aba BBC.

Uretse izo twavuze, BBC Panorama Production yateye inkunga ikorwa rya filime mpamo zikurikira (mbere y’2000): “Journey into Darkness” (1994) ndetse na” Valentina’s Story “(1997) [Inkuru ya Valantina], zombi zayobowe na Fergal Keane, When Good Men Do Nothing (1997) [Iyo nta gikozwe n’Inyangamugayo] na Triomph of Evil (1998) zombi za Steve Bradshaw.

Aba banyamakuru bombi, Fergal Keane na Steve Bradshaw, bakaba ari bo bagaragara nk’ababaye imbarutso y’ikorwa rya filime (zaje no kuba nyinshi nyuma) kuri jenoside yakorewe Abatutsi.

Ni muri uwo myaka kandi, mu w’1997, Televiziyo y’u Rwanda yongeye gukora ndetse ibasha gukoresha bwa mbere “ikinamico mu mashusho” (TV drama) bamwe bakwita “ikinamico mu mashusho ayega”.

Iyi kinamico mu mashusho yiswe Ryumeho gusa yanditswe na Mukeshabatware Dismas, ugaragaramo nk’umukinamico w’imena ndetse akaba yari n’umukinamico w’inararibonye mu itorero Indamutsa rizwi ku makinamico anyura kuri Radiyo Rwanda kuva mu w’1984.

Iyi filime nkinamico ikaba yarayobowe n’abo bagize itsinda ry’Indamutsa, ndetse umuntu ayisesenguye neza akaba yayita ko ari cyo gihangano cy’umwibariro gikozwe mu buryo bwa filime cyari cyanditswe kandi kiyobowe n’Abanyarwanda nyuma ya jenoside yakorewe Abatutsi.

Mu nkuru yacu itaha tuzakomeza kubagezaho amateka ya Sinema Nyarwanda nyuma y’umwaka wa 2000, turebera hamwe uko filime nyarwanda ndetse na filime ku Rwanda zubakiye ku nsanganyamatsiko ya jenoside yakorewe Abatutsi zatangiye kwigaragaza ku bwinshi kugeza no muri Hollywood.

Luc de Heusch (wiyitaga Luc Zangrie) wakoze filime yise “Une République devenue folle Rwanda: 1894-1994”
Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO