UPDATES: Mu Rwanda hamaze kumenyekana 5 banduye Coronavirus

Minisiteri y’ubuzima mu Rwanda yatangaje ko hari abandi bantu bane(4) basanzemo Covid-19 mu Rwanda, aba bose ni Abanyarwanda kandi umwe muri bo ntaheruka kuva mu gihugu.

Nyuma y’amasaha 24 hatangajwe umuntu wa mbere ufite iyi ndwara mu Rwanda, hahise hatangazwa abandi bane.

Imibare iheruka ya OMS/WHO ivuga ko abantu 169,610 ku isi bamaze kwandura iyi ndwara, imaze kwica 6,518 naho 77,776 barayikize.

Laboratoire yitwa National Referral Laboratory mu Rwanda niyo isuzuma iyi virus.

Minisiteri y’ubuzima ivuga ko abandiye iyi ndwara ari; Umunyarwanda w’imyaka 34 wageze mu Rwanda tariki 06/03 aturutse muri Sudani y’Epfo.

Muri Sudani y’Epfo ariko kugeza ubu iyi ndwara ntabwo irahavugwa.

Minisiteri y’ubuzima ivuga ko undi ari umuvandimwe w’uyu, ufite imyaka 36 wageze mu Rwanda tariki 08/03 waje avuye mu birwa bya Fiji anyuze muri Amerika no muri Qatar.

Muri Fiji ntabwo haravugwa iyi ndwara ariko aho bavuga ko yanyuze muri Amerika imaze gufata abantu 3,782 yica 69, naho muri Qatar imaze kwandura abantu 401.

Undi, minisiteri y’ubuzima ivuga ko ari umugabo w’umunyarwanda w’imyaka 30 udaherutse kugira ingendo mu mahanga.

Naho uwa kane ni umusore w’imyaka 22 ufite ubwenegihugu bwa Uganda wageze mu Rwanda ejo ku cyumweru tariki 15 avuye i Londres mu Bwongereza.

Aba bakurikira umuhinde waje mu Rwanda tariki 05/03 nyuma bakamusangamo iyi ndwara nk’uko byatangajwe kuwa gatandatu.

Minisiteri y’ubuzima ivuga ko aba bantu bose bari kuvurirwa ahabugenewe ari nako hashakishwa abantu bahuye nabo ngo basuzumwe.

Kugeza ubu u Rwanda nirwo rufite umubare munini w’abamaze kwandura iyi ndwara mu karere.

Covid-19 muri Afurika yo munsi y’ubutayu bwa Sahara kugeza ubu:

  • South Africa 61
  • Senegal 24
  • Rwanda 5
  • Cameroun 4
  • Ivery Coast 4
  • Ethiopia 4
  • Burkina Faso 3
  • Kenya 3
  • Seychelles 3
  • Nigeria 2
  • DR Congo 2
  • Namibia 2
  • Sudan 1
  • centre Afrique 1
  • Congo Brazza 1
  • Gabo 1
  • Guinea 1
  • Eswatini 1
  • Togo 1
Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO