Umuhanzi Blaise yahamije ko abahanzi mu Rwanda basigaye bahabwa intebe aho bageze hose

Umuhanzi Blaise ni umwe mu bahanzi Nyarwanda bakizamuka ndetse ubwo yari mu kiganiro Access 250 yahamije ko umuhanzi mu Rwanda ari umuntu ukomeye kandi wubashywe cyane.

Mu magambo y’uyu muhanzi aganira na Genesisbizz yatangaje ko umuhanzi ari umuntu ukomeye ndetse utanga ubutumwa bukomeye bushobora gufasha imbaga nya mwinshi yabantu b’ingeri zitandukanye ndetse yakomeje avuga ko hashingiwe ku butumwa umuhanzi agenera abantu bituma ahabwa icyubahiro aho ageze hose.

Uyu muhanzi yahamije ko akora ubwoko bwose bw’umuziki dore ko akunze kwifashisha indirimbo z’abandi bahanzi bityo agasusurutsa abakunzi be mu birori bitandukanye haba muri Hoteli, mu bukwe n’ahandi hatandukanye.


Ubwo yabazwaga impamvu atarasohora ibihangano bye kandi afite impano ikomeye yahamije ko ibihangano bye biri mu nzira ndetse avuga ko akunda gukomwa mu nkokora cyane n’ikibazo kijyanye n’ubushobozi bwo gushyira hanze ibihangano bye aho bikiri ikibazo cy’ingorabahizi dore ko ngo bisaba amafaranga y’umurengera.

Umuhanzi Blaise yahamije ko afite imbogamizi ikomeye aho bimugora cyane kumenya guhitamo igihangano cye kuko ngo bimaze kumubana byinshi.


Uyu muhanzi yatangaje ko mu Rwanda afite abahanzi benshi afatiraho ikitegererezo aho yavuzemo umuhanzi Yvan Buravan ndetse yakomeje yishimira ko kuri ubu mu Rwanda umuziki usigaye ari akazi aho ngo ushobora gukura umuhanzi ku rwego rumwe ukamugeza ku rundi.

Blaise yahamije ko umuhanzi ari umuntu ufatwa nk’inkingi ya mwamba mu kubaka abantu aho yasobanuye ko iteka ibyo umuhanzi aririmbye bikurikirwa kandi bikabasha gutangirwamo ubutumwa bukomeye aho ubu butumwa bugira uruhare mu guhindura imyumvire y’umuntu bityo akaba yahinduka umuntu w’ingirakamaro.

Ubusanzwe amazina nyakuri y’uyu muhanzi yitwa Rwamukwaya Blaise ndetse yaboneye izuba mu karere ka Kicukiro mu gace ka Sonatube, uyu muhanzi kandi yize amashuri abanza kuri APAD maze ayisumbuye ayiga ku kigo kitwa Agahozo Shalom.

Uyu muhanzi yasoje ashishikariza abanyempano batandukanye gukurikira umutima nama wabo bityo bakabasha gukora ibyo bakunda kandi ntibacike intege mu rugendo rwabo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO