Umuhanzi Jean Marie yasohoye indirimbo nshya yise “Warakoze kuryonsa"

Umuhanzi Sibomana Jean Marie Vianney uzwi mu ndirimbo zo Kwibuka Jenoside yakorewe Abatutsi 1994 yashyize hanze indirimbo nshya yise “Warakoze kuryonsa." iyi ndirimbo ayishyize hanze mu gihe Abanyarwanda n’inshuti z’u Rwanda bari mu minsi ijana yo kwibuka ku nshuro ya 27 Jenoside yakorewe Abatutsi.

Muri iyi ndirimbo nshya yise ‘Warakoze kuryonsa “ uyu muhanzi agereranya u Rwanda nk’umubyeyi wabyaye abana benshi ariko akaza kubyaramo ishyano naryo akaryonsa kw’ibere rimwe n’abandi.

Mu kiganiro na Genesisbizz Jean Marie yadutangarije ko iyi ndirimbo “Warakoze kuryonsa" yayikoze nyuma yo kubona uko mu Rwanda nyuma ya Jenoside yakorewe Abatutsi muri 1994, Leta yashyizeho gahunda y’ubumwe n’ubwiyunge mu banyarwanda aho abishe Inzirakarengane muri Jenoside y’Abatutsi muri Mata 1994 babariwe ndetse bagahabawa n’ubutabera bwunga, biciye muri Gacaca maze nabo bakongera kugira ijambo mu gihugu cyababyaye ndetse no mu muryango muri rusange.

Yakomeje atubwira ko muri iyi ndirimbo yifuzaga guhumuriza Abarokotse Jenoside yakorewe Abatutsi, abibutsa ko ababo bishwe batazigera bazima kuko agaciro kabo kataribwa n’imiswa akanibutsa abakomeje kwimana amakuru y’ahajugunywe cyangwa ahashyizwe imibiri y’abatutsi bishwe muri Jenoside ko ukuri n’amaraso bizahora bibatoteza.

Jean Marie asoza asaba abagitsimbaraye ku ngengabitekerezo ya Jenoside ko bayizinukwa byihuse.

Yashimye ko mu Rwanda icyaha ari gatozi bityo agakomeza asaba abafite ipfunwe ry’aho bakomoka cyangwa bafitanye isano n’abagize uruhare muri Jenoside yakorewe Abatutsi muri Mata 1994 ko bakwiyumva nk’abanyarwanda bitezweho umusanzu ukomeye mu kubaka igihugu.

Iyi ndirimbo ayishyize hanze nyuma y’izindi nyinshi zo kwibuka yagiye akora mu bihe bitandukanye nka ’Umusonga’, ‘Ihwa’, ‘Ibikomere’, ‘Ntukazime’, ‘Twazize iki’ n’izindi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO