Umuhanzi Kenny yahishuye ko umuziki we ufasha cyane abana bo k’umuhanda hamwe n’abakene nyakujya

Kenny ni umuhanzi ukizamuka aho avuga ko umuziki akora uyu munsi abikesha umunyamakuru Irene Murindahabi wamukuye mu buzima bwo k’umuhanda akamuhuza n’abantu batandukanye batangira kumufasha mu buryo bunyuranye.

Uyu muhanzi Kenny kuri ubu afite imyaka 19 y’amavuko ndetse yaboneye izuba mu Ntara y’amajyepfo mu karere ka Ruhango, gusa uyu muhanzi aganira na Genesisbizz yahamije ko yanyuze mu buzima bw’inzitane aho yakuriye ku muhanda bijyanye n’ubuzima butari bumeze neza.

Uyu muhanzi ngo nubwo atagize amahirwe yo kwiga umuziki nk’abandi gusa ahamya ko impano ye yatangiye kera ubwo yari umwana muto cyane.

Ubwo yabazwaga uruhare umuziki ufite mu gufasha abantu, uyu muhanzi yahamije ko umuziki we ufasha cyane abantu babayeho mu buzima bubi cyane cyane yagarutse ku bana bakiri ku muhanda aho yahoze ndetse n’abakene nyakujya babayeho mu buzima bubi.

Uyu musore kandi yatangarije Genesisbizz ko hari abahanzi ashimira cyane aho yagarutse k’umuhanzi Niyo Bosco aho yemeza ko uyu muhanzi yamufashije bikomeye.

Uyu musore kandi yakomeje ahamya ko afite imbogamizi zikomeye cyane dore nubwo akora umuziki agifite imbogamizi zijyanye n’ubushobozi bwo gusohora ibihangano bishya kuko bimusaba ubushobozi kandi bukaba bukigerwa ku mashyi.

Gusa uyu muhanzi Kenny yakomeje ashimira abantu batandukanye bakomeje kumuba hafi ndetse bakanamutera inkunga mu buryo butandukanye haba mu buzima busanzwe cyangwa bakamufasha mu bikorwa bijyanye n’umuziki we.

Uyu muhanzi kandi yakomeje avuga ko akibabajwe no kuba mama we umubyara badaherukana ndetse akaba atanazi ko umuhungu we yabaye umuhanzi, gusa ngo ibi bikomeje kumutera imbaraga kugirango aziyereke neza umubyeyi we.

Kuri ubu uyu muhanzi amaze gusohora indirimbo zigera kuri ebyiri gusa yijeje abakunzi be ko agiye gusohora indirimbo nyinshi mu gihe cya vuba dore ko yamaze kubona umufatanyabikorwa witwa "Only One".

Reba indirimbo Nicyo Gihe y’umuhanzi Kenny

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO