Umuhanzi Yvan D nyuma yo kuva mu gihome yakoze Indirimbo y’amashimwe yise sawa

Umuhanzi uririmba indirimbo zo kuramya no guhimbaza Imana, Yvan Gusengimana wamenyekanye nka Yvan D, nyuma yo kuva mu gihome yahise ashyira hanze indirimbo y’amashimwe yise “ sawa “. Muri iyi ndirimbo ashimira Imana uko yamufashije kunyura mu nzira y’inzitane mu gihe gisaga ukwezi.

Uyu muhanzi ni umwe mu baherutse gutabwa muri yombi ari kumwe n’itsinda ry’abapolisi bashinjwa ubuhemu n’ubushukanyi.

Yvan D ashinjwa ubujura bukoresheje ubushukanyi aho we n’iryo tsinda ry’abapolisi bakiriye amafaranga y’abaturage babizeza kubafasha kubona impushya zo gutwara Imodoka dore ko uyu muhanzi asanzwe afite ishuri ryigisha amategeko y’umuhanda.

Mu kiganiro yagiranye na Genesisbizz yadutangarije ko n’ubwo asanzwe ari umuririmbyi w’indirimbo zo kuramya no guhimbaza Imana, Yisanze muri kiriya kibazo atazi uko byagenze.

Nyuma yatubwiye ko ashimira Imana kuko yamurambitseho ibiganza, inzego z’ubutabera zikaza gusanga ari umwere zikamurekura.

Tuganira ku bijyane n’umuziki, uyu muhanzi yadutangarije ko kuva yatangira kuririmba amaze gushyira hanze indirimbo z’amajwi zisaga 10 naho iz’amashusho zikaba ari 6 harimo niyo yise "Sawa" yashyize hanze.

Twamubajije Impamvu indirimbo ye nshya yayise Sawa atubwira ko yayikoze ashaka gutanga ubutumwa ku bantu bose.

Yakomeje atubwira ko umuntu wizeye Yesu ababarirwa muri byose. ibi bikaba byanditswe mu gitabo cy’ibyakozwe n ’Intumwa mu gice cya 13 umurongo wa 39 kugeza kuwa 40.

Yakomeje atubwira ko yakoze iyi ndirimbo nyuma y’uko ahuye n’izo nsanganya akisanga mu buroko ariko kubera ko yizera Yesu akaba yarabashije kubusohokamo n’ubwo bamwe mu bo bari kumwe bagumyemo.

Ku bijyana n’imishinga afite nyuma y’ibibazo avuyemo yadutangarije ko ateganya gushyira hanze alubumu ye hagati muri uyu mwaka amaze kuzuza amashusho yose y’indirimbo afite uko ari icumi .

Mu gusoza yavuze ko ubu agarukanye ingamba zo gukora cyane ndetse akirinda kongera kugwa mu cyaha yaguyemo ubushize kuko igihe cyose umuntu yifuza gukora ibyiza ibibi bikamutanga imbere.

Yakomeje atubwira ko nk’uko yise indirimbo ye Sawa ni nako Yesu ari Sawa cyane igihe cyose umwizeye ntashobora guhura n’ikibazo.


Reba indirimbo SAWA ya Yvan-D hano

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO