Umuhanzi Iteriteka Alexandre uzwi cyane nka Monsieur muduri agaragaje umwihariko wo gukoresha ibikoresho Gakondo mu muziki

Iteriteka Alexandre ni umwe mu bahanzi b’Abarundi bakorera umuziki wabo mu Rwanda ndetse uyu mugabo yatangarije Genesisbizz uburyo gukoresha ibikoresho Gakondo bifite umwihariko ukomeye mu gukora umuziki w’umwimerere.

Mu kiganiro na Genesisbizz umuhanzi Iteriteka Alexandre yatangiye asobanura inkomoko y’izina akunda gukoresha aho abantu benshi bamuzi cyane ku izina rya Monsieur Muduri ndetse mu magambo ye uyu muhanzi yahamije ko iri zina yarihawe n’abana yahoze yigisha ndetse bagakunda kurimuhamagara birangira rimuhamye gutyo.

Uyu mugabo kandi ubwo yabazwaga aho izina rye rihuriye cyane n’umuduri yabashije guhamya ko bifitanye isano cyane dore ko mu bisanzwe ngo nawe akunda cyane igikoresho cy’umuduri cyane.

Uyu muhanzi kandi yabashije gushinga n’itsinda ryitwa umuduri aho hari abahanzi batandukanye bibumbiye muri iri tsinda rye.

Monsieur Muduri kandi uretse gukoresha ibikoresho Gakondo ahamya ko azi no gukoresha ibikoresho by’umuziki bigezweho cyane cyane Guitar hamwe na Piano gusa yakomeje ahamya ko impamvu nyamukuru akunda gukoresha ibikoresho Gakondo ngo ari ukubera impamvu z’uko hari umwe mu bashyitsi bakomeye uturuka i Bwotamasimbi wigeze kumubona akoresha ibikoresho bya kizungu ngo akamubaza impamvu adakoresha ibikoresho Gakondo ndetse ngo kuva icyo gihe yahise atangira gukoresha cyane ivbikoresho Gakondo mu rwego rwo gukora umuziki ufite umwimerere.

Uyu muhanzi avuga ko ibikoresho gakondo bifite umwihariko ukomeye dore ko ahamya ko dukwiye kubikunda kuko ngo mbere ya byose ni by’iwacu kandi avuga ko niyo wasohora indirimbo iri mu ndimi z’amahanga ariko ugakoresha ibikoresho Gakondo ngo bituma abantu batandukanye mu mpande z’Isi bumva ko uwo muziki utandukanye cyane n’indi yose bazi maze bigatuma barushaho kugira amatsiko y’uwo muziki hamwe n’ibikoresho biwugize.

Uyu muhanzi avuga ko yakunze umuziki kuva akiri muto kabone nubwo yaturu8kaga mu muryango utifashije ngo ube wamugurira ibikoresho by’umuziki gusa avuga ko kubera yabikundaga cyane ngo byatumye agira inyota ikomeye yo kurwanirira impano ye binyuze mu guhorana ubushake bwo kumenya ibijyanye n’umuziki ndetse n’uko ukorwa.

Ubwo yabazwaga ku mbogamizi ahura nazo mu muziki akora yahamije ko imbogamizi ahura nazo ari ukubura ahantu amenyekanisha ibikorwa bye by’umuziki kuko ngo bisaba ubushobozi.

Ubwo yabazwaga icyakorwa ngo abantu bose umuziki bakora umenyekane yatangaje ko mu rwego rwo gushyigikira umuziki ku burypo buhamye ngo byaba byiza cyane hariko nk’ibitangazamakuru by’ubuntu nka radiyo ndetse na televiziyo byajya binyuzwaho ibihangano by’abantu bafite impano zikomeye mu gihe badafite ubushobozi bwo kubimenyekanisha ngo bitere imbere.

Ubusanzwe uyu muhanzi amazina ye nyakuri yahawe n’ababyeyi yitwa Iteriteka Alexandre ndetse ni Umurundi ariko kuri ubu utuye mu Rwanda ndetse magingo aya ni ingaragu.


Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO