Umuhanzikazi Kellia yasohoye indirimbo nshya yitwa Mon bebe aho ikubiyemo amagambo meza y’urukundo

Umuhanzi Kellia ni umwe mu bahanzi bakizamuka aho kuri ubu yamaze gusohora indirimbo nshya yise Mon bebe akaba ari indirimbo yiganjemo amagambo y’urukundo kandi ashobora gufasha abakundana.

Uyu muhanzikazi Nyarwanda ari mu bakizamuka ndetse amazina ye nyakuri yahawe n’ababyeyi yitwa Tuyuzere Kelia aho akoresha izina ry’ubuhanzi rya Kellia mu muziki we.

Uyu muahanzikazi yaje kuba asohora indirimbo nshya yise Mon Bebe aho yatangarije Genesisbizz ko iyi ndirimbo ikubiyemo cyane ubutumwa bugenewe cyane abakundana bijyanye n’uko irimo amagambo y’urukundo, iyi ndirimbo kandi yamaze gusohokana n’amashusho yayo.

Uyu muhanzikazi yaboneye izuba mu Murenge wa Gitega ho mu Mujyi wa Kigali gusa yakuriye Kimisagara ndetse akaba ari naho atuye ubu aho ari kumwe n’umuryango we,uyu muhanzikazi Kellia kandi ni umfura mu muryango w’abana bane aho avukana n’abakobwa babiri hamwe n’abahungu babiri.

Kellia yatangiriye amashuri abanza kuri Ecole Primaire de Gitega ndetse yakomereje amashuri yisumbuye mu cyiciro rusange (Tron-Commun)muri Groupe Scholaire de Cyahafi naho amashuri yisumbuye yayarangirije muri Ecole Technique de Karuganda ndetse yaje no kwiga Kaminuza muri IPRC Kigali aho yaharangirije mu mwaka wa 2019.


Uyu muhanzikazi kandi yatangaje ko yatangiye gukora umuziki mu mwaka wa 2017 ubwo yigaga muri kaminuza ya IPRC Kigali aho yatangiriye mu marushanwa yateguwe na kaminuza aza kuba uwa mbere bityo ahabwa igihembo bituma inshuti ye imubwira ko umuziki awushoboye ahita atangira urugendo rwe atyo.

Mu mwaka wa 2018 uyu muahanzikazi yatangiye kujya mu rimwe mu itsinda (Band) rikorera mu gatenga ibijyanye n’umuziki maze atangira gukorana nabo bituma mu mwaka wa 2019 atangira kubona akazi ko kuririmbira abantu mu birori bitandukanye.

Mu mwaka wa 2020 nibwo yinjiye bwa mbere mu nzu itunganya umuziki (Studio)maze bituma asohora icyo gihe indirimbo ye yise Divayi,mu mwaka ushize kandi uyu muhanzikazi yabashije gusohora indi ndirimbo yise Sinicuza isohokana n’amashusho yayo.

Magingo aya Kellia ahamya ko amaze gusohora indirimbo zigera kuri 3 harimo Divayi,Sinicuza hamwe n’iyi ndirimbo nshya yise Mon bebe gusa yakomeje avuga ko afite n’izindi ndirimbo ateganya gusohora mu bihe biri imbere.

Ubwo yabazwaga ibibazo arimo guhura nabyo muri uki gihe cye arimo gutangira umuziki Kelia yatangaje ko ibibazo bikomeye cyane afite ari ibijyanye n’ubushobozi dore ko avuga ko byose ariwe wimenya bigatuma asohora ibihangano acyerewe.

Indirimbo Mon bebe ya Kellia ikomeje gufasha bikomeye abakundana

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO