Umuntu ushaje kurusha abandi ku isi ’Kane Tanaka’ yapfuye afite imyaka 119

Kane Tanaka umugore w’Umuyapanikazi wari ushaje kurusha abandi bantu bose ku isi yapfuye afite imyaka 119 aho yariye ingoma eshanu z’abami b’ubwami bw’Ubuyapani.

Kane Tanaka yavutse tariki 2 Mutarama 1903, intambara ya mbere y’isi n’iya kabiri zose yazibonesheje amaso.

Uyu mukecuru kandi yabaye mu bihe by’icyorezo cy’ibicurane byo mu 1918, aho yari afite imyaka 15, ndetse n’icyorezo cya Covid-19 cyamusanze ku isi , Muri make ni inzu y’ibitabo ihiye.

Kane Tanaka yashyingiwe ku myaka 19 aho yabyaye abana bane ndetse arera n’uwa gatanu.

Mu 1937 Umuhungu mukuru wa Tanaka n’umugabo we bajyiye kurwana intambara n’Ubushinwa aho we yasigaye acuruza amakaroni ashakisha imibereho.

Amwe mu mabanga yamufashije kurama ngo ni ukuryama kare, akabyuka kare, aho nibura yaryamaga saa tatu z’ijoro (21:00) akabyuka saa kumi n’ebyiri (06:00) za mu gitondo ndetse kuri ibyo hiyongeragaho kurya neza ndetse agahora yiga.

Abo mu muryango we bavuga ko yakundaga gukora imibare yo guteranya no gukuramo kugirango akomeze gutyaza ubwenge.

Kuri uyu wa mbere nibwo inkuru y’uko Tanaka yashizemo umwuka yatangajwe n’inzego z’ubuyobozi mu Buyapani, gusa ubuyobozi bw’umujyi wa Fukuoka bwo bukaba bwatangaje ko Tanaka yapfuye tariki 19 Mata gusa ntibahise babitangaza mu itangazamakuru.

Kugeza ubu umuntu ushaje kurusha abandi usigaye ku isi ahumeka uw’abazima nyuma y’urupfu rwa Kane Tanaka, ni mansela wihaye Imana witwa Andre w’Umufaransakazi nk’uko tubikesha ubushakashatsi bwakozwe na Gerontology Research Group, uyu akaba afite imyaka 118 n’iminsi 73.

Kane Tanaka yari afite agahigo ka Guinnes World Records nk’umuntu ushaje kurusha abandi.

Mansela Andre niwe ushaje kurusha abandi bantu bose nyuma y’urupfu rwa Tanaka.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO