Umunyamakuru Yago yatunguwe n’inshuti ze zishimira imyaka ibiri Yago Tv Show imaze ikora

Mu ntangiriro z’ukwezi gushize kwa Ukuboza nibwo humvikanye inkuru yifungwa rya Yago TV Show, televiziyo ikorera kuri Youtube. Impamvu nyamukuru yaturutse ku bibazo nyiri ubwite atabashije gutangaza gusa nyuma y’iminsi mike iyi televiziyo igarutse ku murongo, habaye ibirori byo kwizihiza imyaka ibiri imaze ikora.

Umurongo wa Youtube wa Yago Tv Show washinzwe na Nyarwaya Innocent uzwi nka Yago, awushinga mu gisata cy’Imyidagaduro.

Iyo ugiye mu mateka yawo neza usanga warashinzwe mu mwaka wa 2016 ubwo uyu musore yakoraga muri GoodRich Tv ,aho yaje kuva mu mwaka wa 2017 akajya kuri Tv10.

Ibi Yago yabikoze mu rwego rwo kujya ashyira ibiganiro bitandukanye yakoraga ku rubuga rwa Youtube ndetse byaje gutuma agirana ikibazo n’ubuyobozi bw’iyo televiziyo kuko yashyiragaho ibiganiro byayo nyuma aza kubihagarika.

Ku itariki 17 Mutarama 2020 ubwo uyu musore yari amaze igihe asezeye kuri iyo televiziyo nibwo yatangiye kwikorera ku giti cye maze umurongo wa Youtube wa Yago Tv Show utangira kumenyekana.

Uko iminsi yagiye ishira, uyu musore yaje gukundwa cyane kubera ibiganiro byinshi yagiye akora kugeza ubwo atangiye guhindurira bamwe mu batifashije ubuzima ndetse byatumye uyu murongo ukundwa (likes) ukanarebwa (views) cyane.

Kuri uyu wa mbere, tariki 17 Mutarama 2022 uyu murongo wa Youtube wa yago Tv Show wizihije imyaka ibiri umaze ushinzwe.

Mu rwego rwo gushimira Nyarwanya Innocent uzwi nka Yago, Bamwe mu nshuti ze baramutunguye bamusanga iwe maze bifatanya nawe kwishimira imyaka ibiri amaze akora ndetse banishimira ko yatezwe imitego ariko akabasha kuyisimbuka.

Mu kiganiro na Genesisbizz, Yago yadutangarije ko ari ibyishimo byinshi cyane kuri we kuba televiziyo ye ikorera kuri youtube yongeye gufungurwa nyuma yo kumara iminsi ifunzwe kubera ibibazo byiganjemo ubwumvikane buke n’abandi bantu atatangaje amazina.

Yakomeje atubwira ko yishimiye cyane iki gikorwa cyo kumutungura ku isabukuru y’ imyaka ibiri iyi televiziyo ikorera kuri youtube imaze.

Yakomeje agira ati “ Nkuko nabivuze mu butumwa natanze kuri Youtube yanjye ndashaka kongera gushimira buri muntu wese wafashe umwanya we akatuba hafi n’abo nkorana nabo bose muri ibi bihe bikomeye twarimo, ndabizeza ko ubu noneho aricyo gihe cyo gukorera abanyarwanda batweretse urukundo, Murakoze."


Nyarwaya Innocent washinze Yago TV Show

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO