Umuryango wa DJ Miller ugiye gusohora album yasize yitiriye umukobwa we

Umufasha wa nyakwigendera Karuranga Virgille wamamaye nka Dj Miller agiye gushyira hanze album yasizwe itarangijwe n’uyu mugabo wari umaze kwigarurira imitima ya benshi.

Iyi album izitirirwa Karuranga Shani, umwana w’imfura wa Nigihozo Hope na Dj Miller, bibarutse ku wa 16 Ukwakira 2019.

Umwana w’aba bombi yitwa Karuranga Shani ari naho havuye iri zina ndetse ngo uyu mwana niwe watumye Dj Miller akora iyi album kubwo kugaragaza urugendo yanyuzemo kugira ngo agere kuri uyu mwana.

Mu itangazo bashyize ku mbuga nkoranyambaga zahoze zikoreshwa na Nyakwigendera DJ Miller rivuga ko n’ubwo hari abahanzi bafite amazina akomeye bazagaragara kuri iyi album, bataragera igihe cyo gutangazwa ariko umwe wahise umenyekana ni uwitwa Mike Kayihura.

Iyi album ‘Shani’, izaba iriho indirimbo zitigeze zisohoka ndetse n’izo Dj Miller yashyize hanze zigakundwa nka ‘Trainer’ yakoranye na Christopher, ‘Boss’ yakoranye na Nel Ngabo, ‘Belle’ ari kumwe na Peace&Urban Boys.

Hazaba hariho kandi iyitwa ‘Stamina’ yakoranye na Social Mula, ‘Iri joro ni bae’ yakoranye na Dream Boys, Butera Knowless na Riderman kimwe na ‘Un million c’est quoi’ yakoranye na Peace Jolis.

Album ya mbere ari nayo yanyuma ya Dj Miller yise ‘Shani’, ifite umwihariko w’injyana ya Soul yatunganyijwe mu buryo bw’amajwi na Producer Devy Denko uri mu bamaze igihe mu mwuga wo gutunganya indirimbo.

Hope Nigihozo n’inshuti ze bavuze ‘Tufite icyizere cy’uko muzakomeza kwibuka umurage wa Dj Miller kandi muzakomeza kumuzirikana binyuze muri iyi Album’.
Album yitwa ‘Shani’ [Umukobwa wa Dj Miller akaba n’imfura ye] izasohoka ku wa 04 Ukuboza 2020.

Itangazo ry’umuryango wa Dj Miller

Album ya Dj Miller yayitiriye umukobwa we

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO