Umuryango wa RJSD usanga Itegeko ryo kubona amakuru rikwiye kuvugururwa

Ibigo bitandukanye mu Rwanda bifite aho bihurira n’itangazamakuru birahuriza ku kuba itegeko ryerekeye kubona amakuru rikwiye kuvugururwa no kwigishwa cyane kurushaho kugirango ryihutishe iterambere ry’igihugu. Ibi byagarutsweho mu nama yabaye kuri uyu wa kane tariki ya 18/3/2021, yateguwe na Rwanda Journalists for Sustainable Development ‘RJSD’ hagamijwe gusesengura iyubahirizwa ry’itegeko ryo kubona amakuru muri iki gihe.

Ni inama yateguwe mu rwego rwo gusesengura ibyagaragajwe mu bushakashatsi bwakoze n’ikigo SOBANUKIRWA ku bufatanye na JP Media mu 2020. Ubu bushakashatsi bwagaragaje ko itegeko ryerekeye kubona amakuru mu Rwanda ari ingezi mu iterambere ariko hakaba hari imbogamizi mubo rireba kuko benshi muribo batarisobanukiwe neza.

Iyi nama yitabiriwe n’inzego zitandukanye zifite aho zihuriye n’iri tegeko “Access to Information Law” harimo urwego rw’umuvunyi, RMC, RURA, Transparency International Rwanda, CERULAR, abashakashatsi ndetse n’abanyamakuru.

Bamwe mu banyamakuru bitabiriye iyi nama bagaragaje zimwe mu mbogamizi zirimo kuba bimwa amakuru ntihagire igikorwa, ndetse n’abayabima (abayobozi) ntihagire ingaruka bibagiraho kuko iri tegeko ridafite ingingo riteganya ibihano.

Umwe muri aba banyamakuru ni Samuel Baker BYANSI. Ati: “Itegeko ridafite igihano biragoye ngo rishyirwe mu bikorwa. Rimwe na rimwe iri tegeko ntabwo abantu benshi barizi ariko n’abarizi bahita bamenya imbaraga nkeya zaryo ko ntagihano riteganya, bigatuma baryica nkana. Biragoye rero ngo tuzagera kuri Access to information ku rwego rushimishije mu gihe bataravugurura iri tegeko”.

Undi munyamakuru ni Christophe HITAYEZU. We asobanura ko iri tegeko rikwiye kwigishwa no kurimenyekanisha cyane cyane mu bayobozi ngo kuko abenshi batazi inyungu rifite mu iterambere ry’igihugu. “Ikibazo gihari kugeza ubu ni uko hari abayobozi badasobanukiwe n’iri tegeko bakumva ko umunyamakuru ari umwanzi wabo”.

HITAYEZU akomeza agira ati: “umunyamakuru afite uburenganzira bwo kubona amakuru akayageza ku baturage. Abayobozi ntabwo barumva neza inyungu ziri mu gutanga amakuru kuko nabo ubwabo bibagirira akamaro mu guteza imbere sosiyete bayobora. Abayobozi bakeneye amahugurwa ahagije avuga ibyiza by’iri tegeko”.

Abitabiriye iyi nama bagarutse kandi ku bakozi bashinzwe amakuru (PR, communication & information officers) mu bigo bitandukanye nabo ubwabo bagaragaza imbaraga nke mu gusubanukirwa n’ibikubiye muri iri tegeko nabo bakaba bakeneye kongererwa ubumenyi.

Emmanuel MUGISHA, umunyamabanga nshingwabikorwa w’urwego RMC yemeza ko nawe abantu babangamira iyubahirizwa ry’uburenganzira bwo kubona amakuru bakwiye guhanwa. “Nubwo kugeza ubu bitakorwa ko habaho ibihano ku bantu bimana amakuru afitiye sosiyete akamaro, dusanga hakwiye kujyaho ibihano wenda bitarimpanabyaha, ariko wenda inkiko zikajya zica amazahabu (amande) abantu bishe nkana iri tegeko kugirango umuco wo kwimana amakuru ucike burundu” - MUGISHA.

Ibi bitekerezo kandi byashimangiwe na Cecile MUGENI wari uhagarariye urwego rw’umuvunyi muri ibi biganiro avuga ko ibi bitekerezo agiye kubigeza ku babishinzwe. “nibyo koko iri tegeko ryerekeye kubona amakuru rigomba kuvugururwa, nubwo igihe kitaragera ngo rivugururwe ariko twari twashyizemo n’ingingo zishobora kongerwamo ziteganya ibihano ku bantu bimana amakuru” - MUGENI.

Umuvugizi wa RJSD, Celestin Ntawirema avuga ko igihe kigeze ngo iri tegeko rigirire akamaro igihugu mu iterambere ryacyo nkuko bikubiye muri gahunda z’uyu muryango. Ati: “Iri tegeko ryagiyeho muri 2013 rifite ingingo zumvikana ariko hakenewe kongerwamo izindi mu rwego rwo kubaka urwego rw’itangazamakuru rutajegajega”.

Muri macye turasaba leta yacu kuvugurura itegeko ryerekeye kubona amakuru, ndetse natwe ubwacu nka RJSD twiteguye gutanga umusanzu wacu dushyiraho uburyo buhoraho bwo gukomeza kwigisha abo iri tegeko rireba bakarisobanukirwa kurushaho, kugira ngo bitugeze ku iterambere” - Umuvugizi wa RJSD.

Umuryango RJSD ukaba usaba ko ibi byakorwa mugihe cya vuba, kugirango iri tegeko ryo kubona amakuru rifashe igihugu kugera mu iterembere rirambye nkuko ubusanzwe amakuru ari inkingi ikomeye mu kwihutisha iterambere rya buri wese n’igihugu muri rusange.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO