SALVADOR:Umusifuzi yakubiswe ashiramo umwuka kubera gutanga ikarita itukura ku mukinnyi

Ikinyamakuru cyandikirwa mu gihugu cya Espagne cyitwa Marca nicyo cyatangaje iyi nkuru ivuga ko umusifuzi witwa Jose Arnoldo Amaya w’imyaka 63 y’amavuko yitabye Imana nyuma yo gukubitwa bikomeye n’abakinnyi bafatanyije n’abafana kubera gutanga ikarita itukura k’umukinnyi

Mu mpera z’icyumweru gishize nibwo ibi byabaye uyu musifuzi aza gushiramo umwuka biturutse ku kibazo yagize cyo kuvira imbere cyabaye ubwo yari arimo asifura umukino w’abatarabigize umwuga kuri Stade Toluca i Miramonte.

Amaya, umusifuzi wari ufite uburambe bw’imyaka 20,yakubiswe n’abafana nyuma yo kwerekana ikarita ya kabiri y’umuhondo ku mukinnyi wari ufite uburakari bwinshi.

Bivugwa ko kandi uyu musifuzi yakubiswe n’abakinnyi batandukanye bari bafite uburakari bwinshi cyane kubera ikarita yari yahaye mugenzi wabo bityo bigatuma adakomeza gukina.

Bwana Amaya wari uyoboye uyu mukino yahise asaba ubutabazi bw’ibanze nyuma yo gusagarirwa kuko ngo yarimo kuva amaraso menshi kandi avira imbere gusa yahise ajyanwa mu bitaro byitwa Zacamil gusa ntabwo byaje kugenda neza yahise yitaba Imana.

Ishyirahamwe ry’umupira w’amaguru muri Salvador ryahise risohora igitaraganya itangazo ridasanzwe ry’amagana ibikorwa bibi byakozwsa n’aba bakinnyi.

Iri tangazo ryagiraga riti: "Nka Federasiyo twamaganye ibikorwa byose by’ihohoterwa bikorerwa mu bibuga by’imikino bitandukanye mu gihugu."


Umwaka ushize kandi mu gihugu cya Brazil umukinnyi yatawe muri yombi na Polisi y’iki gihugu ashinjwa ibyaha bitandukanye birimo icyo kugerageza kwivugana umusifuzi nyuma yo kumukubita ku buryo bukomeye.

Ntabwo ari ubwa mbere havugwa cyane urugomo mu mikino itandukanye mu bihugu hirya no hino ku isi cyane cyane mu mukino w’umupira w’amaguru ho n’ibindi bindi.

Magingo aya nta makuru arasohoka agaragaza ko aba bashinzwa gusagarira umusifuzi baba nibura bamaze gutabwa muri yombi ngo baryozwe amahano bakoze.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO