Umutima umenetse! Platini P yaciye bugufi asaba imbabazi abamushinje gushinyagurira Jay Polly

Umuhanzi Nemeye Platin usigaye wiyita P nyuma y’uko asohoye indirimbo ku munsi Jay Polly yitabyeho Imana, Yaciye bugufi asaba imbabazi abari bamufashe nk’umushinyaguzi.

Tariki ya 2 Nzeri nibwo inkuru mbi yamenyekanye ko umuraperi Tuyishime Joshua wamamaye nka Jay Polly yitabye Imana, hari nyuma yo kugezwa ku bitaro bya Muhima akuwe kuri Gereza ya Mageragere aho yari afungiwe.

Kuri uwo munsi binyuze ku rubuga rwa Youtube rw’umuhanzi Platini hahise hajyaho indirimbo bakoranye bombi bise ’Somaho’, ibintu abantu benshi bakurikirana umuziki yaba abafana ndetse na bamwe mu itangazamakuru batakiriye neza.

Iyi ndirimbo yagarukaga ku kunywa inzoga (yamamazaga uruganda Platini aherutse gusinyana narwo amasezerano), ubwo yajyaga hanze mu dukubo bashyizemo (Rest In Peace Jay Polly), bivuze ngo ruhukira mu mahoro Jay Polly, ntabwo byakiriwe neza n’abakunzi b’uyu muhanzi aho byafashwe nko gushinyagurira uyu muraperi wari umaze amasaha make yitabye Imana.

Mu kiganiro na Isimbi Tv uyu mugabo yaciye bugufi avuga byinshi ku bijyanye n’iriya ndirimbo ndetse anasaba imbabazi kuri buri wese byaba byarababaje kw’isohoka ryayo.

Yagize ati “ku bantu nababaje mbanje kubasaba imbabazi kandi nanjye nababariye n’utarabanje kunyumva, bambabarire bivuye ku mutima."ntago byakozwe nko gushyinyangurira umuvandimwe .

Yakomeje agira ati "ubundi twari dufite indirimbo na Jay Polly yitwa ’Somaho’ ariko yari iya Dream Boys ariko nyuma biriya by’amatsinda bimaze kuvaho tuyikora twembi turakosora, iyo ndirimbo tuza gusaba producer ko ayihindura, bikomeza kugorana tugera aho tubivamo turavuga ngo tuzakora indi, iyi ikazasohoka wenda habonetse nk’abayikeneye."

"Nyuma y’uko tubyihoreye naje kubona ikiraka cy’uruganda rwamamaza inzoga, Jay Polly aranyegera arambwira ati: ’Ubwo ubonye akazi ko kwamama inzoga ndabona noneho wa mushinga waya ndirimbo twawubyaza umusaruro’ nibwo twahise tuyisubiramo neza tuyita niryo zina rya Somaho."

Hagati aho Jay Polly yaje gufungwa batarakora amashusho kuko n’ikiganiro cya nyuma bagiranye harimo uburyo izakorerwa amashusho, gusa afungwa bidakozwe, abamuhaye ikiraka bakomeje kumushyiraho igitutu ariko akomeza kubihanganisha.

Ati "ijoro yapfuyemo uwo munsi nibwo bari batangaje ko urubanza rwe rwigijwe inyuma, turavuga tuti reka indirimbo isohoke mu gitondo, ariya mashusho ni ayo twari twarakoze mbere biraho, yari indirimbo yo kwamamaza gusa."

"Urabizi mfite ikipe imfasha, nababwiye ko iyo ndirimbo mu gitondo bayishyira ku mbuga zacu, njya kuryama mu gitondo mbyukira kuri izo nkuru, sinibuka ko hari indirimbo iri busohoke, abo nahaye itegeko ryo kubikora barayisohoye, njye sinanabimenye twiriwe muri ibyo, nimugoroba njya mu kiriyo, ntashye nibwo nabonye ubutumwa buntuka ahantu hose, mbwira ikipe ko twakoze amakosa nti tube tuyikuyeho abantu babanze bumve ubusobanuro bwanjye, tuzaba tuyisubizaho ariko nabwo niba bitari ngombwa navugana nabo nayikoreye umuntu akazabakorera indi."

Yavuze ko kandi nta mutima mubi yabikoranye, asaba imbabazi abo byababaje bose, n’aho ngo kuba baranditse (Rest In Peace Jay Polly) muri title ngo uwukoresha YouTube yamubwiye ko yabikoze mu rwego rwo kumuha icyubahiro ariko ntibyakirwa neza.

Platini na Jay Polly bari inshuti zikomeye cyane kuva mu myaka ya 2008 ubwo umuziki nyarwanda wari utangiye kuzamuka cyane ibintu byaje kubaviramo ubucuti bwabagejeje ku ndirimbo zabo bakoranye nka Mpamiriza ukuri ndetse na Mumutashye bigatuma zikundwa cyane .

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO