Jose Mourinho yabonye akazi ko gutoza AS Roma

Nyuma y’igihe gito Umutoza Jose Mourinho asezerewe ku kazi ko gutoza ikipe ya Tottenham Hotspur FC kubera atigeze yitwara neza mu gihe yari amaze muri iyo kipe kuri ubu amaze kwemezwa nk’umutoza wa AS Roma yo mu gihugu cy’Ubutaliyani.

Nkuko tubikesha ikinyamakuru FranceMercato kimaze gutangaza ko ubuyobozi bwa AS Roma bumaze gushyira hanze itangazo riha ikaze uyu munya Portugali w’imyaka 58 mu ikipe yabo.

Bagize bati “Ikipe ya AS Roma inejejwe no gutangaza ko yamaze kumvikana na José Mourinho, akaba ari umutoza wacu guhera mu mwaka w’imikino wa 2021-2024."

Jose Mourinho asubiye mu gihugu cy’ubutaliyani nyuma yaho mu mwaka wa 2008 kugeza muri 2010 nabwo yatoje muri icyo gihugu mu inter de Milan.

Perezida wa AS Roma Dan Friedkin na Vice-president, Ryan Friedkin bagize bati: ”Twishimiye guha ikaze José Mourinho mu muryango mugari wa AS Roma. Umunyabigwi wegukanye ibikombe bitandukanye kuri buri cyiciro, twizeye ko azubaka ikipe ikomeye izagera kuri byinshi abifashijwemo n’ubunararibonye afite."

Mourinho w’imyaka 58 y’amavuko, yirukanwe muri Tottenham ayimazemo amezi 17 kubera umusaruro mubi, mu kiganiro cye cya mbere nyuma yo guhabwa amasezerano y’imyaka itatu na Roma, yashimiye umuyobozi w’iyi kipe wamutekerejeho ndetse ahamya ko azafasha iyi kipe kugera ku ntego ifite mu cyerekezo bifuza kugeraho.

Jose Mourinho umaze gutwara ibikombe 25 bikomeye ku Isi yasimbuye Paulo Fonseca wari waratangaje ko atazakomezanya n’iyi kipe. Uyu mugabo uzwiho kugira igitsure ku bakinnyi, yatoje amakipe akomeye ku Isi, arimo FC Porto, Inter Milan, Chelsea, Real Madrid na Manchester United yo mu Bwongereza.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO