Akabaye icwende nti koga Kwizera Olivier akomeje kubera Rayon Sports umusaraba

Umutoza mukuru w’ikipe ya Rayon Sports ariwe bwana Jorge Paixã yatangaje ko umunyezamu wa mbere usanzwe ufatira iyi kipe ariwe Kwizera Olivier (Gishweka) yatabye mu nama iyi kipe kuko itazi aho uyu mugabo aherereye kugeza magingo aya.

Kuva ku mukino wa 1/2 cy’igikombe cy’Amahoro Rayon Sports yasezerewemo na APR FC iyitsinze 2-1, ntabwo uyu munyezamu aragaruka mu myitozo y’ikipe ya Rayon Sports.

Kugeza ubu ikipe ya Rayon Sports ikomeje kugira ikibazo cy’abanyezamu kuko umukino yatsinzemo Etincelles FC 3-1 iyi kipe yifashishije umunyezamu Bonheur wari urwaye.

Aganira n’itangazamakuru, umutoza wa Rayon Sports, Jorge Paixão yavuze ko Kwizera Olivier ari umunyezamu mwiza ariko atari umunyamwuga kuko ibikorwa bye atari byiza.

Ati “Olivier Kwizera (Gishweka) sinzi aho ari, iyo urebye kuri Olivier ni ibisanzwe kuri we ntabwo aza mu myitozo buri munsi, Olivier ni umunyezamu mwiza ariko ku kijyanye n’ubunyamwuga ni bibi, ndavuga ibi kuko ntakunda guca ku ruhande, ntabwo ari ibyiza ku bakinnyi bacu, Rayon Sports ni ikipe nziza, agomba kubaha akubaha n’abafana bacu.”

Kwizera Olivier bivugwa ko yaba yarakwepye bitewe n’amafaranga yishyuza iyi kipe imubereyemo itaramuha.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO