Cassa Mbungo umaze imyaka 20 mu butoza afata ate Rayon Sports?

Cassa Mbungo Andrew ni umutoza umaze imyaka isaga 20 ari umutoza w’amakipe atandukanye. Ubu niwe mutoza mukuru w’ikipe ya Rayon Sports. Avuga ko gutoza iyi kipe ari ishema kuri buri mutoza kubera amateka yayo.

Ibi yabitangaje ubwo itsinda ry’abafana (Fan club) ryitwa March’Generation ryizihizaga isabukuru y’imyaka 7 rimaze ribayeho. Ibyo birori bikaba byari byitabiriwe n’ubuyobozi bw’ikipe ya Rayon Sports, umutoza wayo Cassa Mbungo Andrew ndetse na kapiteni wayo Rutanga Eric.

Uyu mutoza yageze mu ikipe ya Rayon Sports muri Gashyantare uyu mwaka. Aza asimbuye Espinoza wirukanwe igice cya mbere cya shampiyona kikirangira.

Mu ijambo yagejeje kuri abo bafana, yabijeje ko azakora ibishoboka byose kugira ngo babone igikombe cya Shampiyona ndetse n’ibindi bizakinirwa byose.

Yagize ati: “Ndashaka gushima abayobozi ba Rayon Sports, ni abayobozi bangiriye ikizere. Kuza muri Rayon Sports byarashobokaga umwaka ushize, ariko ndabashima ko bangiriye ikizere kugira ngo nshobore gutoza ikipe nka Rayon Sports ifite amateka.”

Cassa yababwiye ko iyo atoza ikipe akora ibishoboka byose agatanga ibyo afite ntacyo asize inyuma. Avuga ko aharanira gutwara ibikombe kandi ko nta kintu na kimwe atakora kugira ngo Rayon Sports itware ibikombe.

Amwe mu makipe yo mu Rwanda Cassa Mbungo yatoje harimo AS Kigali, Kiyovu Sports, SEC Academy, Police FC, Sunrise FC ndetse yagiye yitabazwa no mu ikipe y’igihugu ‘Amavubi’. Kuri ubu yasinyiye Rayon Sports kuyitoza imikino yo kwishyura ya shampiyona ndetse n’imikino y’igikombe cy’Amahoro 2020.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO