Umutoza wungirije wa APR Fc yeguye

Umunya-Morocco Nably Bekraoui wari umutoza wungirije mu ikipe ya APR Fc, yasezeye ku mirimo ye avuga ko atazibagirwa ikipe ya APR Fc, nyuma y’umwaka umwe gusa yari ageze muri iyi kipe.

Nably yageze mu Rwanda mu mwaka ushize w’imikino azanye na Adil Mohamed, umutoza mukuru wa APR Fc nawe ukomoka muri Morocco. Uyu mugabo yari ashinzwe kongerera imbaraga abakinnyi mu ikipe ya APR Fc aho yari ayimazemo umwaka umwe w’imikino gusa.

Ku rubuga rwe rwa Instagram, uyu mutoza yavuze ko yeguye ku mirimo ye, gusa nta kintu yavuze gifatika avuga ko yeguriye uyu mwanya. Mu minsi yashize nibwo humvikanye amakuru avuga ko uyu mugabo hari amakipe yo mu Misiri ndetse no ku mugabane w’I burayi amwifuza, gusa akabihakana.

Nably yagize ati: “Njyewe n’umuryango wanjye twakunze buri munota ndetse n’igihe twamaze nkorera kuri ubu butaka bwiza bw’u Rwanda, nubwo tugiye ariko tujyanye umutima umenetse wo kuba tuvuye ku butaka bw’umugisha”

Uyu mugabo kandi yashimye cyane abafana ndetse n’abandi bakunzi ba APR Fc, kubwo urukundo bamweretse ndetse n’umuryango we avuga ko azahoza ku mutima we ikipe ya APR Fc ndetse ko azahora yishimira amahirwe yari yaragiriwe yo gutoza APR Fc.

Nably wageze mu Rwanda mu 2019 aguye mu gihugu cye cya Morocco arangiwe akazi na Adil Mohamed bakoranaga muri iyi kipe. Uyu mugabo akaba yahembwaga akayabo ka Miliyoni hafi 18 z’amafaranga y’u Rwanda.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO