Umwenda Nyarugenge ifitiye Kiyovu, niwo ntandaro yo kutishyura Casa-Theodore.

Umunyamabanga wungirije w’ikipe ya Kiyovu Sports Bwana Ntarindwa Theodore yatangaje ko kuba ikipe ya Kiyovu Sports itarishyura uwahoze ari umutoza wayoCasa Mbungo Andrew ngo byatewe n’inkunga Akarere ka Nyarugenge katigeze gaha iyi kipe, nyamara kari gasanzwe kayibaha.

Ku mugoroba w’ejo tariki 20 Mutarama, nibwo akanama gashyizwe gufata ibyemezo muri Ferwafa kahagaritse ikipe ya Kiyovu Sports kutagura no kutagurisha abakinnyi bitewe n’umwenda barimo umutoza Casa Mbungo wigeze kuyitoza akaza gutandukana n’iyi kipe atarangije amasezerano.

Mu kiganiro Theodore Ntarindwa yagiranye na Genesisbizz, yatangaje ko byatewe n’akarere Nyarugenge katabahaye ibyo kari gasanzwe kabaha, bigatuma batishyura umutoza Andrew Casa Mbungo, amafaranga ahwanye n’amezi atatu bari bamurimo.
Yagize ati: "Mu by’ukuri turemera ko ayo mafaranga tuyamufitiye, akomoka ku birarane by’amezi agera kuri 3 twari tumurimo, kuko ayo mafaranga yakomokaga ko muterankunga wacu w’Akarere ka Nyarugenge atari yayaduhaye ntitwamwishyuye gusa nawe arabizi kuko we yakurikiranaga iby’ikipe umunsi ku munsi."

"Twaje gukorana amasezerano yaba Nyarugenge, Kiyovu Sports ndetse na Casa twemeranwa ko ibirarane by’akarere ka Nyarugenge nibabyishyura tuzamuha amafaranga ye. Ariko yahise abona indi kipe, ibyo ntawabimugayira, aza kujya muri Kenya turabyemera, ndetse adusezera afite amasezerano muri Kiyovu kandi ayo masezerano yavugaga ko usezera undi agomba kwishyura amafaranga asigaye, twe ayo mezi turayihorera. Tweretse izo mpapuro zose Ferwafa zuko twagiranye amasezerano na Nyarugenge ndetse na Casa bavuga ko twatsinzwe, twagombaga kumwishyura." Ntarindwa Theodore aganira na Genesisbizz.

Kiyovu Sports iherutse gusinyana amasezerano na Azam yo kuyitera inkunga mu myaka ine.

Ubuyobozi bwa Kiyovu kandi bwatangaje ko icyemezo cyabufatiwe cyo kutagura no kugurisha abakinnyi ntacyo kivuze ngo kuko batabiteganyaga uyu mwaka, gusa bongeraho ko bagiye gushaka uko bishyura uyu mutoza.

Ntarindwa Theodore yagize ati: "Twe ntawe duteganya kugura yenda ubwo cyatureba umwaka utaha (icyemezo), mu mikino yo kwishyura ariko noneho twebwe nk’abantu twemera ideni tuzicarana na Casa turebe uko twamwishyura kuko icyo cyemezo ntikitureba ntabwo kidufasheho cyatureba wenda umwaka utaha."

Ikipe ya Kiyovu Sports yahagaritswe kugura no kugurisha abakinnyi n’ishyirahamwe ry’umupira w’amaguru mu Rwanda Ferwafa, kugeza igihe iyi kipe izishyurira uwahoze ari umutoza wayo mukuru Casa Mbungo Andrew amafaranga ahwanye n’igihe cy’amezi atatu bari bamurimo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO