Urugaga rwa Sinema mu Rwanda rwihanangirije abakinisha abana by’umwihariko filime z’urukozasoni

Ubuyobozi bw’Urugaga rwa Sinema mu Rwanda, Rwanda Film Federation (RFF), bwatanze itangazo riburira bamwe mu bangiza amahame ya Sinema mu Rwanda cyane ku bantu bakoresha abana bari munsi y’imyaka 18 nta burenganzira ndetse n’abakora filime z’urukozasoni.

Muri iryo tangazo basohoye rigenewe Abanyamakuru bavuze ko harimo ingingo esheshatu basabwa gukora, kwitwararika no kubahiriza ayo mabwiriza.

Ingingo ya mbere ivuga ko buri wese bitewe n’umwuga akora muri Sinema asabwa kwegera ihurira (Union). Aha ni ukubasaba ko bagomba kwibaruza kugirango bashyirwe mu mubare w’abakora uwo mwuga.

Bati “Ibi bigamije kumenya umubare nyawo w’abari muri uwo mwuga, kugira ngo hakorwe ubushakashatsi bw’ibyo bakeneye gukorerwa byabafasha kongererwa ubumenyi, guhabwa amahugurwa mashya baba bakeneye, kuba ba Rwiyemezamirimo (Abanyamwuga), kudakorera mu kajagari ndetse no gukorerwa ubuvugizi.”

Ingingo ya kabiri ivuga ko ikarita y’umunyamuryango bari basanganywe (License Cards) zitacyemewe gukoreshwa. Bityo Ubuyobozi bw’Urugaga buramenyesha abakora umwuga wa Sinema mu Rwanda, baba abibumbiye mu mahuriro cyangwa abatarayajyamo, ko hari Ikarita nshya.

Iyo karita izajya itangirwa ku cyicaro cy’Urugaga rwa Sinema mu Rwanda, binyujijwe mu mahuriro y’ibyiciro bya Sinema babarizwamo.

Bitewe n’ubufatanye n’inzego zitandukanye z’Igihugu zifite Sinema mu nshingano, Ubuyobozi bw’Urugaga buramenyesha umuntu wese ushaka kugira igikorwa cya Sinema akorera mu gihugu ko asabwa kwegera Urugaga rwa Sinema mu Rwanda, Rwanda Film Federation (RFF), kugira ngo ahabwe ubufasha bw’ibanze.


Filime zitambuka ku rubuga rwa You tube ubu usanga arizo zikunzwe cyane

Bati “Ibyo bimuhesha uburenganzira bwo gufashwa n’izindi nzego za Leta dukorana nazo umunsi ku munsi hagamijwe gukorera mu mirongo migari yashyizweho yo gukorera mu mucyo kandi hubahirizwa amategeko.”

Aha harimo abashaka gukora ibikorwa byo gutoranya abakinnyi (castings/Auditions), gutunganya film mu ifatwa ry’amashusho n’amajwi (Film Production), amahugurwa, gushimira abari mu mwuga wa Sinema (Movie Awards) n’amaserukiramuco ya Sinema (Film Festivals). Umuntu wese uzafatirwa muri ibi bikorwa mu buryo butazwi azirengera ingaruka z’iyo mikorere mibi.

Nta wemerewe gukinisha umwana ataruzuza imyaka 18 nta Burenganzira

Bavuga ko nta muntu wemerewe gukinisha muri film umwana uwo ari we wese mu gihe ataruzuza imyaka 18 y’amavuko, atabiherewe uburenganzira n’ababyeyi be cyangwa abamurera.

No mu gihe yaba yabiherewe uburenganzira, ntabwo aba yemerewe kumukinisha iby’urukozasoni n’ibyatuma ararukira mu ngeso mbi zinyuranye kuko aba atarageza ku myaka yo kwifatira ibyemezo.

Uzafatwa yarenze kuri aya mabwiriza ngo azashyikirizwa inzego za Leta zibifitiye ububasha kugira ngo akurikiranweho amakosa cyangwa icyaha azaba yakoze.

Ngo nta muntu ukwiye kwitwaza ibikorwa bya Sinema ngo yake ruswa iyo ari yo yose yaba iy’amafaranga cyangwa se iy’igitsina.

Kuri YOU TUBE barasabwa kubaka indangagaciro z’Abanyarwanda

Abakorera kuri za YOU TUBE barasabwa gutekereza, kwiga no gusesengura ibihangano byabo hagamijwe kureba icyo bimarira Abanyarwanda mu kubaka indangagaciro zabo zishingiye ku muco, ku bumuntu, gukunda Igihugu no ku budasa.

Bati “Abanyarwanda mu ruhando mpuzamahanga. Tuboneyeho kumenyesha abakora ibihangano biteye isoni byo muri ubwo buryo ko babireka kuko hari uburyo bwinshi bunyuranye bakoramo basigasira isura y’Igihugu cyacu kandi ibyo bakora bigakundwa.”

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO